ÝUNISEF-iň sebit direktorynyň Türkmenistana sapary dialogyň täze tapgyryny alamatlandyrdy
Ýewropa we Merkezi Aziýa ýurtlary boýunça ÝUNISEF-iň sebit direktory Regina de Dominiçis Türkmenistana resmi saparyny üstünlikli tamamlady. Saparyň dowamynda ýurdumyzyň ýaş nesliniň hukuklaryny we abadançylygyny goramaga ýokary derejede ygrarlydygy tassyklandy. Saparyň maksatnamasy Aşgabatda hem-de welaýatlarda hökümet derejesindäki duşuşyklary we durmuş maksatly edaralara baryp görmegi öz içine aldy.
Paýtagtda Regina de Dominiçis Ministrler Kabinetiniň Başlygynyň orunbasarlary — Baýramgül Orazdurdyýewa we Hojamyrat Geldimyradow bilen gepleşikleri geçirdi. Taraplar 2026–2030-njy ýyllar üçin täze Ýurt hyzmatdaşlyk maksatnamasynyň çäginde hyzmatdaşlygy pugtalandyrmak meselelerini giňişleýin ara alyp maslahatlaşdylar. Bu ugurda çaganyň irki ösüşine, maýyplygy bolan çagalary goldamaga hem-de howa şertlerine durnukly «ýaşyl mekdepleri» döretmäge aýratyn üns berildi. Şeýle hem dialogyň möhüm bölegi hökmünde çagalaryň bähbidine gönükdirilen durmuş maksatnamalarynyň döwlet tarapyndan maliýeleşdirilmeginiň gurallary ara alnyp maslahatlaşyldy.
Saparyň dowamynda adam hukuklarynyň monitoringine aýratyn ähmiýet berildi. Türkmenistandaky Adam hukuklary boýunça ygtyýarly wekil Ýazdursun Gurbannazarowa bilen geçirilen duşuşyklarda ÝUNISEF BMG-niň Çaganyň hukuklary boýunça komitetiniň teklipleriniň ýerine ýetirilmegini mundan beýläk-de goldamaga taýýardygyny tassyklady.
Saparyň amaly bölegi sebit direktoryna enäniň we çaganyň saglygyny goramak ulgamyna goýlan maýa goýumlaryň netijeleri bilen tanyşmaga mümkinçilik berdi. Mary welaýatynda Regina de Dominiçis welaýat häkimi Döwranberdi Annaberdiýew bilen duşuşdy, şeýle hem welaýat çagalar hassahanasyna we 3-nji Saglyk öýüne baryp gördi. Aşgabatda bolsa ol 74-nji synag inklýuziw mekdebine baryp, mugallymlar we okuwçylar bilen gürrüňdeş boldy hem-de deň şertlerde bilim almagy üpjün etmekde aýratyn goldawyň netijeliligini belledi.
Saparyň jemlerini jemläp, Regina de Dominiçis ösüşi skrining etmek we inklýuziw bilimi ösdürmek ýaly ulgamlaýyn çäreleriň eýýäm oňyn netijeleri berýändigini nygtady. Ol ÝUNISEF bilen Türkmenistanyň Hökümetiniň arasyndaky ýakyn hyzmatdaşlygyň ýurdumyzdaky her bir çaganyň parahatçylykly we durnukly ösüş şertlerinde öz mümkinçiliklerini doly durmuşa geçirmegine ýol açjakdygyna ynam bildirdi.
ORIENT
