e.gov.tm portalynda boý we agram onlaýn hasaplaýjysy elýeterlidir
Häzirki wagtda adamyň boýy bilen beden agramynyň arabaglanyşygyny birnäçe minudyň dowamynda onlaýn görnüşde kesgitlemek mümkindir. e.gov.tm Döwlet hyzmatlarynyň elektron portalynyň «Saglygy goraýyş ulgamy» bölüminde ýerleşdirilen «Boý we agram hasaplaýjysy» atly sanly hyzmat işlemegini dowam etdirýär.
Bu hyzmat Türkmenistanyň Saglygy goraýyş we derman senagaty ministrligi tarapyndan işlenip düzülip, ulanyjylara hödürlenýär. Ol girizilen maglumatlaryň esasynda beden agramynyň indeksini (BAI) özbaşdak hasaplamaga mümkinçilik berýär. Hasaplamanyň netijesine görä, ulgam görkezijini lukmançylyk taýdan kabul edilen klassifikasiýa laýyklykda — agramyň ýetmezçiliginden başlap, semizligiň dürli derejelerine çenli — degişli kategoriýa bölýär.
Onlaýn hasaplaýjydan peýdalanmak üçin hasaba alynmak talap edilmeýär. Boýy (santimetr bilen) we agramy (kilogram bilen) girizip, «Hasapla» düwmesine basmak ýeterlikdir. Netije dessine görkezilýär.
Bu sanly gural e.gov.tm portalynyň giňden ulanylýan hyzmatlarynyň biri bolmagynda galyp, ilatyň saglygynyň esasy görkezijileri barada habarlylygyny ýokarlandyrmaga hem-de elektron lukmançylyk hyzmatlarynyň ösdürilmegine ýardam edýär.
ORIENT
