Prezident Serdar Berdimuhamedow Sadyr Žaparowy doglan güni bilen gutlady
Türkmenistanyň Prezidenti Serdar Berdimuhamedow Gyrgyz Respublikasynyň Prezidenti Sadyr Žaparowa doglan güni mynasybetli gutlaglaryny iberdi.
Döwlet Baştutanymyz öz gutlagynda Sadyr Žaparowyň "öňdengörüjilikli we ynamly ýolbaşçylygynda" Gyrgyz Respublikasynyň döwlet gurluşyny pugtalandyrmakda, jemgyýetçilik-ykdysady ösüşde hem-de halkara derejede abraýyny has-da belende galdyrmakda uly üstünlikleri gazanmagyny dowam etdirýändigini aýratyn belledi.
Hormatly Prezidentimiz Türkmenistan bilen Gyrgyz Respublikasynyň arasyndaky ähli ugurlar boýunça hyzmatdaşlygyň işjeň we netijeli häsiýetini belläp, ýurtlarymyzyň arasyndaky dostlukly gatnaşyklary berkitmäge Prezident Sadyr Žaparowyň şahsy goşandyny nygtady.
Türkmenistanyň Prezidenti Serdar Berdimuhamedow Prezident Sadyr Žaparowa berk jan saglyk, bagtyýarlyk, Gyrgyzystanyň halkynyň bähbidine alyp barýan jogapkärli döwlet işinde täze üstünlikleri arzuw etdi.
6-njy dekabrda Sadyr Žaparow 56 ýaşyny belleýär.
