Serdar Berdimuhamedow oba hojalyk pudagyndaky ylmy-barlag işlerini diwersifikasiýalaşdyrmagy tabşyrdy: Mary welaýatyna iş sapar
2-nji dekabrda Prezident Serdar Berdimuhammedow Mary welaýatyna iş saparyny amala aşyrdy. Saparyň maksady sebitde möwsümleýin oba hojalyk işleriniň barşy we Oba milli maksatnamasyndan gelip çykýan wezipeleri ýerine ýetirmek boýunça ýaýbaňlandyrylan giň möçberli işler bilen tanyşnakdan ybarat boldy.
Döwlet Baştutanymyz bu ýerde oba hojalyk toplumynyň ýolbaşçylarynyň gatnaşmagynda iş maslahatyny geçirdi we onuň dowamynda agrosenagat toplumyny ösdürmegiň esasy ileri tutulýan ugurlary kesgitledi: ekerançylykda diňe ylmy, innowasion esaslaryna geçmek.
Prezident Serdar Berdimuhamedow wise-premýer Taňryguly Atahallyýewyň ylmy-barlag institutlarynyň (Ylmy-barlag däneçilik, Ekerançylyk we Pagtaçylyk institutlary) işi baradaky hasabatyny diňläp, ekerançylyk ýerleriniň hasyllylygyny artdyrmagyň we azyk howpsuzlygy üpjün etmek meselesiniň çözgüdi ylmy-barlag işleriniň hiline gönüden-göni baglydygyny nygtady. Ylmy-barlag institutlarynyň alyp barýan işini diwersifikasiýalaşdyrmak hem-de öňdebaryjy dünýä tejribeleriniň we döwrebap agrotehniki usullaryň netijeli öwrenilmegi möhümdir.
Döwlet Baştutanymyz oba hojalyk ekinleriniň hasyllylygyny ýokarlandyrmak we önümçilige innowasion tehnologiýalary ornaşdyrmak üçin toplumlaýyn ylmy işleriň zerurdygyny aýratyn nygtady.
Türkmenistanyň Prezidenti seçgiçi alymlara ýurduň özboluşly toprak-howa şertlerine laýyk gelýän ýokary hasyl berýän sortlary döretmek ugrundaky işlere üns bermegi tabşyrdy.
Prezident Serdar Berdimuhamedow alymlaryň bu ugurdaky tejribesini artdyrmak, hünär derejesini ýokarlandyrmak meseleleriniň yzygiderli gözegçilikde saklanmalydygyny aýdyp, bu babatda birnäçe anyk tabşyryklary berdi.
Iş maslahatyny jemläp, Türkmenistanyň Prezidenti ylmy taýdan esaslandyrylan bu özgertmeleriň üstünlikli durmuşa geçirilmegi daýhanlaryň yhlasly zähmetiniň oňyn netije bermegine, bäsdeşlige ukyply önümleriň öndürilişini artdyrmaga we ýurtda azyk bolçulygyny üpjün etmäge möhüm goşant goşjakdygyny nygtady.
