Türkmenistan ýurdumyzyň banklarynyň auditi boýunça halkara bäsleşigini yglan edýär
Türkmenistanda ýurdumyzyň esasy karz edaralarynyň maliýe hasabatynyň garaşsyz barlagyny geçirmek üçin abraýly daşary ýurt auditor kompaniýalaryny saýlamak maksady bilen halkara bäsleşigi yglan etmegi meýilleşdirilýär.
Bu teklip, 28-nji noýabrda, anna güni geçirilen Türkmenistanyň Hökümet mejlisinde, Türkmenistanyň Ministrler Kabinetiniň Başlygynyň orunbasary Hojamyrat Geldimyradow tarapyndan hormatly Prezidentimiz Serdar Berdimuhamedowa hödürlenildi.
Mälim edilmegine görä, audit barlagyndan geçjek banklar: Türkmenistanyň Döwlet ösüş banky, Döwlet daşary ykdysady iş banky, “Daýhanbank”, “Türkmenistan” döwlet täjirçilik banklary, “Türkmenbaşy”, “Halkbank”, “Senagat”, Türkmen-türk paýdarlar täjirçilik banklary.
Barlag "Karz edaralary we bank işi hakynda”, “Auditorçylyk işi hakynda” Türkmenistanyň Kanunlaryna hem-de “Türkmenistanda buhgalterçilik hasaba alnyşy we auditi özgertmegiň maksatnamasy hakynda” Türkmenistanyň Prezidentiniň Kararyna laýyklykda geçiriler.
Dünýäniň abraýly halkara edaralarynyň sanawyna girýän auditor kompaniýalarynyň bu işe çekilmegi karz edaralarynda maliýe hasabatlarynyň takyklygyny seljermäge hem-de bank işiniň ugurlaryna baha bermäge mümkinçilik döreder.
Hormatly Prezidentimiz Serdar Berdimuhamedow hasabaty diňläp, ýurdumyzyň banklary tarapyndan köpçülikleýin habar beriş serişdelerinde audit barlaglary boýunça halkara bäsleşikleri yglan etmek baradaky teklibi goldady hem-de bank ulgamynyň işini kämilleşdirmek boýunça alnyp barylýan işleri mundan beýläk-de dowam etdirmegiň zerurdygyna ünsi çekdi.
ORIENT
