Türkmenistan bilen Gazagystanyň arasyndaky oba hojalygyndaky söwda dolanşygy 37% artdy
24-nji oktýabrda Türkmenistanyň Prezidentiniň Astana şäherine döwlet saparynyň çäginde iki ýurduň oba hojalyk edaralarynyň arasynda jikme-jik gepleşikler geçirildi. Türkmenistanyň Oba hojalyk ministri Çaryýar Çetiýew gazak kärdeşi Aýdarbek Saparow bilen duşuşyp, oba hojalyk pudagyndaky hyzmatdaşlygyň häzirki ýagdaýyny we mümkinçiliklerini ara alyp maslahatlaşdy.
Aýdarbek Saparow Türkmenistanyň Gazagystanyň oba hojalyk önümleriniň eksporty üçin ileri tutulýan bazardygyny, oba hojalyk pudagynyň özi bolsa hyzmatdaşlyk gurluşynda aýratyn orun tutýandygyny nygtady.
Gazagystan Respublikasynyň Oba hojalyk ministrliginiň maglumatlaryna görä, şu ýylyň netijeleri uly ösüş görkezýär: 9 aýyň dowamynda iki ýurduň arasyndaky oba hojalyk söwda dolanyşygy 103 million dollara ýetip, 37,5% ösüş derejesini görkezdi. Gazagystan tarapy öňünden maliýeleşdirme we bilelikdäki kärhanalary döretmek ýaly täze hyzmatdaşlyk mehanizmlerini teklip etdi.
Duşuşygyň dowamynda taraplar maldarçylyk önümleriniň söwdasyny giňeltmek üçin weterinariýa lukmançylygy we biohowpsuzlyk meseleleri babatda mundan beýläk-de hyzmatdaşlyk etmek barada hem pikir alyşdylar.
Iki ýurduň ylmy institutlarynyň arasyndaky hyzmatdaşlygyň, şol sanda bilelikdäki ylmy-barlag işleriniň, tejribe alyş-çalşygynyň we obasenagat toplumy üçin ýokary hünärli işgärleri taýýarlamagyň möhümdigi aýratyn nygtaldy.
Türkmenistanyň Oba hojalyk ministri Çaryýar Çetiýew bilelikdäki taslamalary işjeň durmuşa geçirmäge, söwda dolanyşygyny artdyrmaga we iki ýurduň arasynda azyk howpsuzlygyny pugtalandyrmaga Türkmenistanyň taýýardygyny nygtady.
ORIENT
