Hytaý Huafa Snow World-y açdy: Dünýädäki iň uly ýapyk dag lyža kurorty
Hytaýyň iň uly megapolisleriniň biri bolan Şençžende ägirt uly sport-dynç alyş toplumy — Huafa Snow World açyldy. Onuň emeli gar meýdany 100 müň inedördül metre ýetýär, bu bolsa ony dünýäde gar bilen örtülen meýdany boýunça iň uly ýapyk dag-lyža kurortyna öwürýär.
Gurluşygy 29 milliard ýuana düşen toplum, garyň seýrek duş gelýän sebitinde ýylyň hemme paslynda dynç almaga mümkinçilik berýär. Taslama ýerli hökümet tarapyndan goldanyldy, sebäbi ol syýahatçylygy ösdürmegi we gyş sport görnüşlerini ýaýbaňlandyrmagy maksat edinýär.
Huafa Snow World diňe bir gyşy gaýtalamaýar, onuň bilen birlikde aýratyn mümkinçilikleri hem hödürleýär. Toplumda halkara derejesindäki bäş trassa ýerleşýär. Iň uzyn trassanyň uzynlygy 441 metre, beýiklik tapawudy bolsa 83 metre barabar. Ýokary hil derejesini üpjün etmek üçin howanyň temperaturasy hemişe 6°C derejesinde saklanylýar.
Lyžadan we snoubordingden başga-da, toplumda 33 metre beýiklikdäki buz şarlawugy bar we onuň içinde 33 metre çuňlukdaky daýwing howuzy ýerleşýär. Mundan başga-da, tolkunly howuzly we skalodromly «gury» bölüm hem bar.
Syýahatçylaryň rahatlygy üçin toplumyň özünde garly ýapgytlara açylýan görnüşli JW Marriott myhmanhanasy, söwda we restoran zolaklary gurlupdyr. Täze başlanýanlar üçin üç sagatlyk girişlerden başlap, profesionallar üçin uzak sessiýalara çenli dürli bilet bukjalary hödürlenýär.
Bu kurortyň açylmagy, Hytaýyň gyş sport görnüşlerini ösdürmek we geljekki çempionlar üçin türgenleşik merkezlerini döretmek boýunça uly döwlet maksatnamasynyň bir bölegi bolup durýar.
ORIENT
