Türkmenistan dünýädäki goýun we geçi etini köp sarp edýän ýurtlaryň hataryna girdi
BMG-niň Azyk we oba hojalygy guramasynyň (FAO) maglumatlaryna görä, Türkmenistan goýun we geçi etini adam başyna sarp etmek boýunça dünýäniň öňdebaryjy döwletleriniň biri hasaplanýar. Soňky Statistika maglumatlaryna laýyklykda, ýurt her adama ýylda 20,3 kilogram sarp etmek bilen dördünji ýerde ýerleşdi.
Bu netije Türkmenistanda goýundarçylyk pudagynyň we goýun etiniň milli aşhanada aýratyn orun eýeleýändigini görkezýär. Ownuk şahly mallaryň etleri milli tagamlarda giňden ulanylýar hem-de halkyň iýmitleniş medeniýetiniň möhüm bölegini emele getirýär.
FAO-nyň maglumatlaryna görä, dünýäde goýun we geçi etini iň köp sarp edýän ýurtlar şulardyr:
• Mongoliýa — 68,5 kg,
• Bahreýn — 23,4 kg,
• Täze Kaledoniýa — 21,9 kg,
• Türkmenistan — 20,3 kg,
• Çad — 19,0 kg.
Mongoliýadaky ýokary görkezijiler bu ýurduň çarwa çopan däplerine hem-de etiň esasý iýmit çeşmesi bolup durmagyna baglydyr. Mundan başga-da, dünýädäki umumy statistikalar başga ugurlary hem görkezýär:
• Sygyr etini iň köp sarp edýän döwletler — Argentina, Zimbabwe we ABŞ
• Towuk etini iň köp sarp edýän ýurtlar — Karib we Okeaniýa sebitleriniň ýurtlary, şol sanda Sent-Winsent we Grenadinler, Tonga hem-de Marşall Adalary.
Dünýäniň dürli ýurtlarynda et sarp edilmegine medeni aýratynlyklar, ykdysady şertler hem-de ýerli oba hojalygynyň mümkinçilikleri uly täsir edýär. Şol nukdaýnazardan, Türkmenistan öz milli däplerini saklamakda hem-de azyk howpsuzlygyny üpjün etmekde et önümçiliginiň ähmiýetiniň dowamly ösýändigini görkezýär.
ORIENT
