Brýussel: Gündogar myhmansöýerliginden Ýewraziýa geçelgelerine çenli
Türkmenistanyň Belgiýa Patyşalygyndaky Ilçihanasy parlament agzalaryndan, şäherleriň häkimlerinden we jemgyýetçilik işgärlerinden ybarat bolan Türkiýäniň wekilçilikli wekilýeti bilen dialog geçirdi. Ilçihananyň “Eurovia VZW” gurmasy bilen netijeli hyzmatdaşlygynyň logiki dowamy bolan duşuşyk Türkiýäniň Belgiýadaky Ilçisi Bariş Tantekin gatnaşmagynda geçirildi.
Duşuşyk hakyky Gündogar myhmansöýerliginiň atmosferasyna aralaşmak bilen açyldy. Türkiýeli myhmanlar üçin däp bolan türkmen tagamy taýýarlanyldy: hoşboý ysly palaw, manty, gök çaý we milli süýjülikler.
Milli aşhananyň tagamlary bilen birlikde, Türkmenistanyň maddy mirasynyň aýdyň kesimi görkezildi. Özüne mahsus türkmen amaly sungatyny görkezýän sergi aýratyn gyzyklanma döretdi: elde dokalan haly önümleri, kümüş şaý-sepler, milli lybaslar we saz gurallary. Wideo şekilleriň üsti bilen myhmanlara ýurduň häzirki zaman keşbi görkezildi – onuň depginli ykdysady ösüşi, iri infrastruktura taslamalarynyň durmuşa geçirilmegi we baý syýahatçylyk mümkinçilikleri.
Maksatnamanyň esasy wakalarynyň biri Türkmenistanyň ilçisiniň hemişelik Bitaraplygyň özboluşly halkara hukuk derejesine bagyşlanan brifingi boldy. Ilçi Sapar Pälwanow bitaraplygyň daşary syýasatyň esasyndan öňüni alyş diplomatiýasynyň we dialogynyň netijeli guralyna öwrülendigini, ählumumy derejede parahatçylygy we howpsuzlygy öňe sürýändigini nygtady. BMG-da Türkmenistanyň başlangyçlaryna, şol sanda Halkara parahatçylyk we ynanyşmak ýylyna aýratyn üns berildi.
Söhbetdeşligiň dowamynda Türkmenistanyň we Türkiýäniň çemeleşmeleriniň arasyndaky düýpli meňzeşlikler bellenildi: iki ýurdy diňe bir taryhy kökler we medeni-siwilizasiýanyň umumylygy däl, eýsem daşary syýasatda meňzeş garaýyşlar hem birleşdirýär.
Ara alyp maslahatlaşmalaryň dowamynda hyzmatdaşlygyň amaly ugurlarynyň üstünde hem durlup geçildi. Türkmen tarapy ýurtlaryň arasynda ynam köprülerini gurmak üçin bitaraplygyň möhümligi, şeýle hem Ýewraziýanyň sebitlerini birleşdirýän ulag-logistika we energetika geçelgelerini ösdürmegiň strategik ähmiýeti barada pikirlerini beýan etdi. Bu çemeleşmeler türk myhmanlarynda seslenme tapdy, sebäbi beýan edilen çemeleşmeler Türkiýäniň Ýewropa bilen Aziýanyň arasyndaky baglanyşygy we dialogy berkitmek isleglerine laýyk gelýär.
Şu nukdaýnazardan, türk we yslam dünýäsiniň formatlarynda (bilim, medeniýet, ykdysadyýet, ýaşlar syýasaty) işjeň ýagdaýda pugtalanýan halklaryň arasyndaky doganlyk gatnaşyklaryna ýokary baha berildi.
Dabaranyň ahyrynda, “Eurovia VZW” meýdançasy arkaly geçirilen bu duşuşygyň resmi ýollaryň üstüni ýetirýän we ýurtlaryň arasyndaky özara düşünişmegi berkidýän netijeli halk diplomatiýasynyň amaly mysaly bolup hyzmat edýändigi nygtaldy.
Türkmenistanyň Brýusseldäki Ilçihanasy ýaşlar bilen gatnaşyklary giňeltmäge gönükdirilen taslamalary yzygiderli goldaýar, bu bolsa parahatçylyk we ynanyşmak medeniýetini pugtalandyrmaga möhüm goşantdyr.
ORIENT
