Türkmenistan Merkezi Aziýanyň we Azerbaýjanyň döwlet Baştutanlarynyň 2026-njy ýyldaky Konsultatiw duşuşygyna başlyklyk eder
Türkmenistanyň Prezidenti Serdar Berdimuhamedow 16-njy noýabrda Daşkentde Özbegistan Respublikasynyň Prezidenti Şawkat Mirziýoýewiň başlyklygynda geçirilen Merkezi Aziýa döwletleriniň Baştutanlarynyň ýedinji Konsultatiw duşuşygyna gatnaşdy.
Sammite şeýle hem Azerbaýjanyň Prezidenti Ilham Aliýew, Gazagystanyň Prezidenti Kasym-Žomart Tokaýew, Gyrgyzystanyň Prezidenti Sadyr Žaparow, Täjigistanyň Prezidenti Emomali Rahmon we BMG-niň Merkezi Aziýa üçin öňüni alyş diplomatiýasy boýunça Sebitleýin merkeziniň ýolbaşçysy Kaha Imnadze gatnaşdy.
Gün tertibine laýyklykda, sebitleýin hyzmatdaşlygy mundan beýläk-de pugtalandyrmak, şeýle hem ileri tutulýan ugurlarda bilelikdäki taslamalary we başlangyçlary durmuşa geçirmek meseleleri ara alnyp maslahatlaşyldy.
Sammitiň başynda Şawkat Mirziýoýew Azerbaýjanyň Konsultatiw duşuşygynyň formatyna doly hukukly gatnaşyjy hökmünde goşulandygyny yglan etdi. Özbegistanyň Lideriniň nygtaýşy ýaly, bu çözgüt umumy taryhy kökleri, doganlyk gatnaşyklary, ruhy we medeni ýakynlyklary bilen berk baglanyşykly halklarymyzyň bähbitlerine doly laýyk gelýär.
Şeýle hem, ol bu strategik ädimiň Konsultatiw duşuşyklaryna güýçli itergi berjekdigine, söwda-ykdysady, maýa goýum, medeni-ynsanperwer hyzmatdaşlygy giňeltmek, şeýle hem durnukly ösüş meseleleri boýunça bitewi çözgütleri işläp düzmek üçin täze mümkinçilikleri açjakdygyna ynam bildirdi.
Özbegistanyň Prezidenti Türkmenistanyň Prezidentini 2026-njy ýylda eýýäm täze “Merkezi Aziýa we Azerbaýjan” formatynda geçiriljek döwlet Baştutanlarynyň Konsultatiw duşuşygynyň başlyklygyny kabul etmegi bilen gutlady.
Soňra Merkezi Aziýa döwletleriniň we Azerbaýjanyň Liderleri, şeýle hem BMG-niň Merkezi Aziýa üçin öňüni alyş diplomatiýasy boýunça Sebitleýin merkeziniň ýolbaşçysy Kaha Imnadze çykyş edip, BMG-niň Baş sekretary Antonio Guterreşiň ýüzlenmesini okady.
ORIENT
