Türkmenistan bilen Eýran bilelikdäki söwda zolagyny döretmegi ilerledýärler – Gülüstanda duşuşyk geçirildi
Eýranyň Gülüstan welaýatynda Türkmenistanyň hem-de Eýran Yslam Respublikasynyň degişli döwlet edaralarynyň wekillerinden ybarat toparynyň bilelikdäki serhet söwda zolagyny döretmek baradaky ikinji iş duşuşygy geçirildi.
Duşuşyk Ykdysady Hyzmatdaşlyk Guramasynyň (YHG / ECO) Iş toparynyň çäklerinde geçirildi we serhet ýakasynda söwda bazarynyň gurluşygy bilen bagly amaly meselelere gönükdirildi. Türkmen wekiliýeti Türkmenistanyň Prezidenti Serdar Berdimuhamedow tarapyndan YHG agza-döwletleriniň arasynda söwda dolanyşygyny artdyrmak üçin serhet we sebitleýin söwda mümkinçiliklerini işjeň ulanmagyň möhümdigi barada öňden nygtalyp gelýändigini belläp geçdi.
Taraplar dörediljek söwda zolagynda has amatly wiza we gümrük düzgünlerini ýola goýmagyň zerurlygyny ara alyp maslahatlaşdylar. Bu taslama pes ösen ýurtlaryň maýa goýmaga taýýarlyk meseleleri jikme-jik işlenilmeginiň ähmiýeti bellenildi. Eýran tarapynyň bellemegine görä, söwda zolagynyň gurluşygy bilen bir wagtda serhet geçelgesiniň pandemiýa döwründen öňki kuwwatyna doly gaýtarylmagy wajypdyr.
YHG wekilleri bu taslamanyň durmuşa geçirilmeginiň Gurama agza döwletleri üçin nusgalyk taslamalaryň biri boljakdygyny nygtadylar. Ýakyn wagtda «Altyn Asyr» – «Inçeburun» gümrük-geçiş nokadynda söwda zolagyny döretmek boýunça ylalaşyk taslamasynyň we meýilnamanyň taýýarlanyp, taraplara hödürlenmegine garaşylýar.
Duşuşygyň ahyrynda indiki iş duşuşygyny Türkmenistanda geçirmek teklip edildi. Serhet söwda zolaklarynyň döredilmegi Türkmenistanyň uzak möhletli başlangyçlarynyň biri bolup durýar. 2023-nji ýylda Türkmenistanyň ýolbaşçylary eýran tarapyna «Sarahs – Sarahs» we «Altyn Asyr – Inçeburun» geçelgelerinde şeýle zolaklary döretmek mümkinçiliklerini öwrenmegi-de teklip edipdi. Şeýle taslamalaryň amala aşyrylmagy iki ýurduň arasyndaky söwda-ykdysady hyzmatdaşlygy giňeltmäge we haryt dolanyşygyny ep-esli artdyrmaga gönükdirilendir.
Häzirki wagtda Türkmenistanyň we Eýranyň arasyndaky serhetde 4 sany gözegçilik-geçiriş nokady işleýär: «Altyn Asyr» – «Inçeburun» Balkan welaýatynyň we Eýranyň Gülüstan welaýatynyň serhedinde, «Sarahs» – «Sarahs», «Artyk» – «Lütfabat» we «Gaudan» – «Bajgiran» bolsa Ahal welaýatynyň Horasan Rezawi welaýatynyň serhedinde ýerleşýändir.
ORIENT
