«Google» täze stilde: «Gemini» emeli aň programmasynyň yzysüre «Google Kartalaryň» we «Google Fotonyň» şekli üýtgeýär
«Google» öz önümleriniň wizual stilini giň gerimde täzeläp, «Gemini» emeli aň (AI) ulgamynyň integrasiýasyny has-da öňe sürýär. Baş logotipiň we «Gemini» programmasynyň nyşanynyň üýtgedilmeginden soň, kompaniýa indi meşhur hyzmatlarynyň — «Google Fotonyň» we «Google Kartalaryň» üçin täze gradientli (reňk utgaşykly) logotipleri tanyşdyrmaga taýýarlanýar.
Täze nyşanlar «Google» kompaniýasynyň däp bolan dört reňkine (gyzyl, sary, ýaşyl, gök) esaslanýar, ýöne indi bu reňkler gradient geçişleri arkaly birleşdirilýär. Kompaniýanyň beýannamasynda bellenilişine görä, has ýiti we öwüşginli reňk sazlaşygy «emeli aň bilen baglanyşykly innowasiýa we döredijilik energiýasynyň joşgunyny» alamatlandyrýar.
Täze logotipleriň şekilleri eýýäm internetde peýda boldy:
«Google Kartalar»: Logotip nawigasiýa nyşany ýerleşdirilen öňki meşhur formasyny saklaýar, ýöne ol has inçelipdir, onuň içindäki tegelek bolsa ep-esli ulaldylypdyr. Bu üýtgeşmeler «Gemini» emeli aň goşundysynyň täze mümkinçilikleri bilen baglanyşykly — ol ulanyjylara gyzykly ýerleriň sanawyny düzmäge we ugurlary taýýarlamaga kömek edýär.
«Google Foto»: Logotip öňki görnüşini saklaýar, emma onuň ähli gurluşy indi merkezden daşyna geçýän gradient effektine esaslanýar. Kiçeldilen görnüşde logotip has doýgun görünýär, ulaldylanda bolsa onuň içki bölegi has açyk öwüşginde ggöze ilýär.
«Google» täze logotipleri ýakyn günlerde mobil programmalarda we web hyzmatlarynda ornaşdyrar. Şeýdip kompaniýa öz brendiniň wizual birmeňzeşligini (bir görnüşliligini) doly tamamlamagy maksat edinýär.
ORIENT
