Türkmen hünärmenleri FAO tarapyndan brussellýoz boýunça geçirilýän amaly okuwlara gatnaşýarlar
Türkmenistanda 22-nji oktýabrdan bäri FAO-nyň sebitleýin taslamasy — «Merkezi Aziýada pandemiýalara taýýarlyk we “Bir saglyk” ýörelgesine esaslanýan jogap çäreleri» maksatnamasynyň çäginde brussellýozyň öňüni almak, anyklamak we gözegçilik işleri boýunça okuw-türgenleşigi dowam edýär.
Amaly bölegi Ahal welaýatynyň Gökdepe etrabynyň “Sahabatly” hojalyk jemgyýetiniň maldarçylyk toplumynda geçirilýär.
Türgenleşigi FAO-nyň köp ýyllyk tejribä eýe halkara ekspertleri — Swetlana Bardenşteýn we Nadaw Galon alyp barýarlar. Olar haýwan keselleriniň ýokanç görnüşleriniň epidemiologik gözegçiligi, anyklanylyşy we öňüni alyş usullary boýunça uly tejribe topladylar.
Türkmen tarapyndan okuw işleriniň utgaşdyrylmagyny Türkmenistanyň Oba hojalyk ministrliginiň ýanyndaky Döwlet weterinariýa gullugynyň halkara we ylmy gatnaşyklar bölüminiň müdiri, milli ekspert Arslan Soltanmyradow üpjün edýär.
Okuwa döwlet weterinariýa we sanitariýa-epidemiologik gulluklarynyň hünärmenleri, weterinariýa barlaghanalarynyň işgärleri hem-de Arkadag şäherindäki Atçylyk ylmy-barlag merkeziniň wekilleri gatnaşýarlar.
Bu türgenleşik “Bir saglyk” ýörelgesini durmuşa geçirmäge gatnaşýan dürli ministrlikleriň we edara-kärhanalaryň wekillerini birleşdirýär. Bu bolsa Türkmenistanyň adam, haýwan we daşky gurşaw arasyndaky ulgamlaýyn özara gatnaşygy üpjün etmäge bolan ygrarlylygyny görkezýär.
FAO-nyň bilermenleri türgenleşigiň ýokary guramaçylyk derejesini hem-de gatnaşýan hünärmenleriň işjeňligini belläp geçdiler. Arslan Soltanmyradow bolsa milli hünärmenleri halkara weterinariýa standartlary boýunça taýýarlamakda berýän amaly goldawy üçin olara minnetdarlyk bildirdi.
Bu çäre Türkmenistanyň haýwan saglygyny goramak we biologik howpsuzlyk ugurlaryndaky döwlet syýasatyny durmuşa geçirmäge, şeýle hem hünärmenleriň hünär mümkinçiliklerini ösdürmäge we halkara hyzmatdaşlygyny pugtalandyrmaga uly goşant goşýar.
ORIENT
