Türkmenistanyň Prezidentiniň Italiýa saparynyň gün tertibinde ykdysady dialog we medeni gatnaşyklar
23-nji oktýabrda, penşenbe güni, geçirilen Türkmenistanyň Hökümetiniň mejlisinde Ministrler Kabinetiniň Başlygynyň orunbasary, daşary işler ministri Raşid Meredowyň Türkmenistanyň Prezidentiniň Italiýa Respublikasyna boljak resmi saparyna taýýarlyk görlüşi barada hasabaty diňlenildi.
Prezident Serdar Berdimuhamedow Türkmenistanyň Italiýa Respublikasy bilen gatnaşyklary ösdürmäge uly ähmiýet berýändigini nygtady we wise-premýer, daşary işler ministrine öňde boljak resmi sapara gowy taýýarlyk görmegi tabşyrdy.
Öňde boljak sapar 39 sany döwletara resminamalaryň binýadynda gurlan ikitaraplaýyn gatnaşyklaryň has-da giňeldilmeginde möhüm ädime öwrüler.
Saparyň esasy wakalary
Döwlet Baştutanlarynyň duşuşygy: 24-nji oktýabrda ýokary derejedäki gepleşikleriň geçirilmegi.
Ykdysady dialog: Prezidentiň energetika, ulag we hususy telekeçilik ulgamlaryndaky hyzmatdaşlygy giňeltmäge gönükdirilen türkmen-italýan işewürler forumyna gatnaşmagy.
Medeni diplomatiýa: Rimiň Kapitoliý muzeýinde geçiriljek “Türkmenistanyň gadymy siwilizasiýasy” atly serginiň açylyş dabarasyna gatnaşmak.
Saparyň jemleri boýunça hyzmatdaşlygyň esasy ugurlary boýunça ikitaraplaýyn resminamalaryň toplumyna gol çekmek meýilleşdirilýär.
Strategiki we ynsanperwer hyzmatdaşlyk
Hasabatda bellenilişi ýaly, iki ýurduň arasyndaky hyzmatdaşlyk ýokary derejeli özara gatnaşyk bilen häsiýetlendirilýär:
Syýasy goldaw. Italiýa Türkmenistanyň başlangyjy bilen BMG-niň Baş Assambleýasy tarapyndan kabul edilen kararnamalaryň ählisini goldady we hem-de olaryň 10-syna döredijileriň biri bolup çykyş etdi.
Medeni miras. Italiýanyň arheologik missiýalary 30 ýyldan gowrak wagt bäri Türkmenistanyň taryhy ýadygärliklerinde bilelikdäki ylmy-barlag işlerini alyp barýarlar. Rimde geçirilmegi meýilleşdirilýän iri göwrümli arheologik sergisi (2025-nji ýylyň oktýabr aýyndan 2026-njy ýylyň aprel aýyna çenli aralykda) munuň aýdyň subutnamasydyr.
Bilim gatnaşyklary. Hyzmatdaşlyk TEMPUS (ERASMUS) maksatnamalaryň ugurlary boýunça amala aşyrylýar. Türkmenistanyň ýokary okuw mekdepleriniň 3-sinde we orta mekdepleriniň 6-synda italýan dili öwredilýär.
Bu sapar hyzmatdaşlygyň ykdysady ugruny pugtalandyrmagy we Türkmenistanyň baý taryhy we medeni mirasyny Ýewropa giňişliginde görkezmegi maksat edinýär.
ORIENT
