Koreýaly hyzmatdaşlar Hazarýaka “Balkan” gämi gurluşyk zawodyndaky gurluşyk işleriniň öňegidişligini tassyklaýarlar
Türkmenistan Hazar deňzindäki gämi gurluşyk kuwwatyny ösdürmekde dünýäniň öňdebaryjy tehnologiýalaryny, şol sanda Koreýa Respublikasynyň tejribesini işjeň ulanýar.
Ýakynda Koreýa Respublikasynyň Türkmenistandaky işleri wagtlaýyn ynanylan wekili Kim Jun Çol “Balkan” gämi gurluşyk we abatlaýyş zawodyna sapary amala aşyrdy. Ol şol ýerde bilelikdäki taslamanyň durmuşa geçirilişiniň barşy bilen tanyşdy diýip, Koreýanyň Türkmenistandaky ilçihanasynyň resmi web sahypasynda habar berilýär.
Bu saparyň çäginde gämi gurluşygy ulgamyndaky ikitaraplaýyn hyzmatdaşlyk meseleleri ara alnyp maslahatlaşyldy hem-de 6100 tonna göterijilik kuwwatyna eýe bolan iki köpmaksatly ýük gämisiniň (MPC) gurluşygy alnyp barylýan meýdança synlandy. Taslama Koreýanyň “Koryo Shipbuilding Industry Technology Co., Ltd.” (KSIT) kompaniýasy bilen hyzmatdaşlykda amala aşyrylýar.
“Balkan” zawodynyň baş direktory Güýçmyrat Amanow bilen geçirilen duşuşykda gämi gurluşygy we gämi abatlaýyş pudaklarynda hyzmatdaşlygy giňeltmegiň mümkinçilikleri ara alnyp maslahatlaşyldy.
Zawoda guralan bu sapar, Türkmenistanyň deňiz infrastrukturasyndaky döwrebaplaşdyrma ugrunyň berk berjaý edilýändigini hem-de ýurdumyzyň Hazar deňzindäki möhüm üstaşyr merkez hökmünde ornuny pugtalandyrmak üçin öňdebaryjy tehnologiýalary ulanmak islegini görkezdi. Jenap Kim Jun Çol KSIT kompaniýasynyň işgärleri bilen hem duşuşyp, olara türkmen zawodyndaky yhlasly we jogapkärli zähmeti üçin minnetdarlyk bildirdi.
ORIENT
