Nazaryýetden amalyýete: logistika hünäriniň talyplary gurluşykda smeta işiniň esaslaryny öwrendiler
Oktýabryň 8-ne Türkmenistanyň Döwlet binagärlik we gurluşyk institutynyň ykdysadyýet we dolandyryş fakultetiniň “Logistika” hünäriniň 3-nji ýyl talyplary nazary bilimlerini pugtalandyrmak maksady bilen amaly sapak geçirdiler. Sapagyň esasy maksady gurluşyk pudagynyň aýratynlyklary bilen tanyşmak, şol sanda fundamentleriň gurluşyny we çykdajy smetasynyň ähmiýetini öwrenmek boldy.
Sapagyň dowamynda çykdajy smetasynyň gurluşyk işlerinde iň möhüm guralyň biri bolup durýandygy nygtaldy. Onuň kömegi bilen aşakdaky möhüm wezipeler ýerine ýetirilýär.
• Meýilleşdiriş we esaslandyryş: Taslama çözgütleriniň deňeşdirilmegi, gurluşygyň ýerine we maksadalaýyklygyna baha berilmegi, maýa goýumlarynyň meýilleşdirilmegi.
• Ylalaşyk gatnaşyklary: Smeta potratçy bilen baş gurluşyk guramasynyň arasynda şertnama baglaşmak, bahany ylalaşmak we işleriň tertibini düzmek üçin esas bolup hyzmat edýär.
• Netijeliligi seljermek: Smetanyň esasynda zähmet çykdajylary, kärhananyň meýilleşdirilen we hakyky girdejisi kesgitlenýär, bu bolsa önümçilik-ykdysady seljerişi geçirmäge mümkinçilik berýär.
Şeýlelikde, logistika ugury boýunça geljekki hünärmenler üçin smeta işini bilmek gurluşyk taslamalaryny netijeli dolandyrmakda örän möhüm bolup durýar.
Ýurdumyzyň bilim we ylmy binýadyny ösdürmek nukdaýnazaryndan, häzirki wagtda döwrebap innowasion enjamlar bilen enjamlaşdyrylan Binagärlik we gurluşyk institutynyň täze binasynyň gurulmagy we ulanyşa berilmegi ylmy işlere güýçli itergi berjekdigi bellenildi.
Täze barlaghanalarda alnyp barylýan ylmy-innowasion işler talyplaryň, mugallymlaryň we alymlaryň döredijilik başlangyçlarynyň üsti bilen Türkmenistanyň ykdysadyýetiniň sanly gurluşlaryny pugtalandyrmaga möhüm goşant goşar.
ORIENT
