Mega şertnama: OpenAI 6 GW şertnamada AMD-nyň paýlaryny satyn almak hukugyny aldy
OpenAI kompaniýasy AMD korporasiýasy bilen köpýyllyk şertnama baglaşdy, bu şertnama täze emeli aň maglumat merkezlerini döretmek üçin grafiki prosessorlaryň (GPU) üpjünçiligini göz öňünde tutýar. Bu hasaplaýyş klasterleriniň umumy kuwwaty 6 gigawatt (GW) bolar, bu bolsa takmynan tutuş Singapuryň elektrik energiýasyna bolan ortaça islegine deňdir.
Şertnamanyň umumy bahasy resmi taýdan mälim edilmedi, ýöne derňewçiler oňa onlarça milliard dollarlyk baha berýärler. Şertnamada strategik bölek hem bar: OpenAI, uzak möhletleýin opsion bolan warrant arkaly AMD-nyň paýlarynyň 10%-ine çenli satyn almak hukukyny aldy. OpenAI, AMD paýlarynyň bahasy $600-a ýeten ýagdaýynda, bellenen tapgyrlara ýetilende 160 milliona çenli paýy nominal bahadan satyn alyp biler.
Täze 6 GW klasterler täze nesil AMD Instinct MI450 akseleratorlarynyň esasynda gurular. Kuwwaty takmynan 1 GW bolan ilkinji tapgyryň işe girizilmegi 2026-njy ýylyň ikinji ýarymyna meýilleşdirilýär.
OpenAI üçin bu şertnama üpjün edijileriň köpdürlüligini üpjün etmekde we bir öndürijä bolan garaşlylygy azaltmakda möhüm ädimdir. Mundan öň, sentýabr aýynyň 22-de kompaniýa Nvidia bilen bilelikde umumy kuwwaty azyndan 10 GW bolan infrastrukturany döretmek niýetini mälim edipdi, onuň hem ilkinji tapgyry 2026-njy ýylda işe giriziler.
AMD üçin bolsa bu ylalaşyk ýokary girdejili emeli aň akseleratorlary bazarynda Nvidia bilen bäsleşikde möhüm tapgyr bolup durýar. Şertnama baradaky habar AMD paýlarynyň bahasynyň premarketde 28%-den gowrak ýokarlanmagyna sebäp boldy.
Şol bir wagtyň özünde OpenAI kompaniýasy, Broadcom bilen hyzmatdaşlykda öz emeli aň çipini döretmek boýunça işler alyp barýandygy barada habar berilýär, bu bolsa kompaniýanyň has garaşsyz we güýçli hasaplaýyş mümkinçiliklerine eýe bolmak ugrunda agressiw strategiýasyny görkezýär.
ORIENT
