Sekiz minutda döredilen chatbot: OpenAI täze AgentKit ady bilen emeli aň agentlerini döretmek guraly bilen tanyşdyrdy
OpenAI kompaniýasy programmirlemesiz emeli aň agentlerini döretmäge mümkinçilik berýän täze guraly — AgentKit bilen tanyşdyrdy. Täze platforma DevDay atly maslahatda görkezildi.
AgentKit ulanyjylara agentiň hereket logikasyny tapgyrlaýyn kesgitlemäge mümkinçilik berýän wizual guralyny hödürleýär: ulanyjy bilen aragatnaşykdan başlap, internet çeşmelerine ýüzlenmek, maglumatlar binýady bilen işlemäge we jogaplary belli formatda düzmäge çenli mümkinçilikler göz öňünde tutulandyr.
Täze guralyň esasy aýratynlygy — onuň ýönekeýligi we tizligi. DevDay-de geçirilen görkezilişde OpenAI wekilleri bary-ýogy sekiz minutda web sahypasy üçin doly işleýän chatbot döretdiler. Mundan başga-da, AgentKit-de emeli aňyň hereketlerini gözegçilikde saklamak üçin goşmaça howpsuzlyk serişdeleri hem girizilendir.
Platforma dürli ugurlar üçin niýetlenendir — kiçi telekeçilikde müşderi goldaw botlaryny döretmekden başlap, iri kompaniýalarda hakyky wagt tertibinde statistikany seljerýän içki maslahatçy agentlere çenli.
DevDay gatnaşyjylary eýýäm AgentKit-iň irki elýeterliligini alyp başladylar. OpenAI täze önümine umumy elýeterliligiň haçan başlanjakdygyny entek resmi taýdan mälim etmedi.
