Türkmenistanyň Döwlet haryt-çig mal biržasy «Şahsy otag» ulgamyna bagyşlanan seminary geçirer
Türkmenistanyň Döwlet haryt-çig mal biržasy müşderiler üçin täze sanly ulgam bolan «Şahsy otag» ulgamynyň netijeli ulanylyşyna bagyşlanan okuw seminarynyň geçiriljekdigini habar berdi. Bu ulgam biržanyň hyzmatlarynyň açyklygyny, elýeterliligini we netijeliligini ýokarlandyrmaga gönükdirilendir.
Biržanyň maglumatlaryna görä, seminar “Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyny” hem-de “Türkmenistanda sanly ykdysadyýeti ösdürmegiň 2021-2025-nji ýyllar üçin Döwlet maksatnamasyny” durmuşa geçirmegiň çäklerinde guralýar.
Seminaryň dowamynda gatnaşyjylar ulgamyň esasy mümkinçilikleri bilen tanyşyp bilerler. «Şahsy otag» arkaly ulanyjylar hasaba durup, şertnamalaryň we hasaplaşyklaryň ýagdaýyny yzarlaýarlar, maliýe akymlaryny dolandyrýarlar, dolandyryş paneli arkaly habarnamalary alýarlar, hasap maglumatlaryny täzeleýärler, bildiriş kanallaryny dolandyrýarlar we akkauntyň howpsuzlyk sazlamalaryny ýerine ýetirip bilerler.
Birža müşderilere «Şahsy otag» ulgamyny netijeli ulanmagyň tertibini jikme-jik düşündirmegi hem-de seminaryň dowamynda ýüze çykýan ähli soraglara jogap bermegi meýilleşdirýär.
Seminar 2025-nji ýylyň 15-nji oktýabrynda, sagat 11:00-dan 13:00-a çenli, Aşgabat şäherindäki Arçabil şaýoly 52 salgysynda ýerleşýän Türkmenistanyň Söwda toplumynyň uly mejlisler zalyň ikinji gatynda geçiriler.
