Aşgabatda Irlandiýanyň ilçisi akkreditirlendi – Kler Brosnan ynanç hatyny gowşurdy
Aşgabat, 30-njy sentýabr | ORIENT. Türkmenistanyň Mejlisiniň Başlygy Dünýägözel Gulmanowa Irlandiýanyň Türkmenistanda täze bellenen Adatdan daşary we Doly ygtyýarly Ilçisi Kler Brosnandan ynanç hatyny kabul etdi.
Irlandiýanyň Prezidenti Maýkl Daniel Higgins özüniň diplomatik hatynda hanym Kler Brosnanyň bellenmegini Irlandiýa bilen Türkmenistanyň arasyndaky dostlukly gatnaşyklary mundan beýläk-de pugtalandyrmak maksadyny görkezýändigini belledi.Irlandiýanyň Prezidenti onuň ýokary şahsy häsiýetlerini belledi we ilçiniň özüne ynanylan wezipäni mynasyp derejede ýerine ýetirjekdigine ynam bildirip, Türkmenistana abadançylyk we gülläp ösüş baradaky tüýs ýürekden arzuwlaryny ýetirdi.
Duşuşygyň dowamynda Türkmenistanyň Milli parlamentiň ýolbaşçysy Dünýägözel Gulmanowa ilçini jogapkärli wezipä bellenilmegi bilen gutlady we ikitaraplaýyn gatnaşyklary mundan beýläk-de pugtalandyrmak boýunça işinde üstünlikleri arzuw etdi.
Öz tarapyndan Kler Brosnan Irlandiýanyň ýolbaşçylyklarynyň Türkmenistanyň Prezidenti Serdar Berdimuhamedowa iberen mähirli salamyny, iň gowy arzuwlaryny beýan etdi. Şeýle hem ol milli parlamentiň düzümi we kanunçylygy döwrebaplaşdyrmak boýunça alyp barýan işleri, Türkmenistanyň içeri hem-de daşary syýasatynyň esasy ugurlary bilen tanyşdy.
Pikir alyşmalaryň dowamynda taraplaryň ikisi hem hyzmatdaşlygy işjeňleşdirmäge, şeýle hem abraýly halkara guramalary arkaly Türkmenistanyň Ýewropa Bileleşigi bilen gatnaşyklaryny pugtalandyrmaga ähmiýet berýändigini bellediler.
Ilçi Türkmenistanda Irlandiýa wekilçilik etmegiň özi üçin uly hormatdygyny nygtady we dürli ugurlarda ýurtlaryň arasynda özara peýdaly dialogy ösdürmek üçin ähli tagallalary etmäge taýýardygyny tassyklady.
Şeýle hem şol gün Irlandiýaniň ilçisi (oturýan ýeri Moskwa ş.) Türkmenistanyň DIM-de kabul edildi. Hanym Kler Brosnan bilen Daşary işler ministriniň orunbasary Serdar Muhammetdurdyýewiň arasynda geçirilen duşuşykda syýasy-diplomatik, söwda-ykdysady hem-de medeni-ynsanperwer ugurlarda ikitaraplaýyn hyzmatdaşlygyň häzirki ýagdaýy ara alnyp maslahatlaşyldy.
Türkmenistan bilen Irlandiýanyň halkara guramalaryň, ilkinji nobatda BMG-niň çäklerinde ýola goýlan hyzmatdaşlyk tejribesine eýedigi, şol sanda iki ýurduň Baş Assambleýanyň birnäçe Kararnamalarynyň bilelikdäki awtordaşlary hökmünde çykyş edendikleri bellenildi. Şunuň bilen baglylykda köptaraplaýyn meýdançalarda ýakyn hyzmatdaşlygy dowam etmegiň ähmiýetini nygtaldy.
Hyzmatdaşlygyň şertnama-hukuk binýadyny giňeltmek şeýle hem iki ýurduň ylym-bilim edaralarynyň arasyndaky gatnaşyklary pugtalandyrmak meselelerine aýratyn üns berildi.
Irland tarapy Türkmenistanyň hemişelik Bitaraplygynyň 30 ýyllygyna bagyşlanan halkara çärelerine işjeň gatnaşmaga çagyryldy.
