Türkmenistanyň Prezidenti BMG-niň BA-nyň meýdançasynda Şweýsariýanyň Prezidenti bilen duşuşdy
BMG-niň Baş Assambleýasynyň 80-nji sessiýasyna gatnaşmagynyň çäginde Prezident Serdar Berdimuhamedow Şweýsariýa Konfederasiýasynyň Prezidenti Karin Keller-Zutter bilen duşuşyk geçirdi. Gepleşikler hemişelik bitaraplyk ýörelgelerine esaslanýan iki ýurduň arasyndaky gatnaşyklaryň berk häsiýetini tassyklady.
Halkara giňişlikde Türkmenistan hem, Şweýsariýa hem bitaraplyk ýörelgelerine esaslanýar. Bu aýratynlyk halkara giňişliginde hyzmatdaşlygy ösdürmek, parahatçylygy we durnuklylygy berkitmek üçin berk binýat bolup hyzmat edýär.
Duşuşygyň dowamynda söhbetdeşler söwda-ykdysady we maýa goýum ulgamlarynda hyzmatdaşlygy ilerletmegiň meseleleri barada pikir alyşdylar. Maliýe ulgamy, derman senagaty, “ýaşyl” energetika hyzmatdaşlygyň geljegi uly ugurlarynyň hatarynda bellenildi. Medeni-ynsanperwer ulgamyndaky hyzmatdaşlyklar halklary ýakynlaşdyrmakda möhüm orny eýeleýär.
Prezident Serdar Berdimuhamedow Karin Keller-Zutteri 12-nji dekabrda Aşgabatda geçiriljek halkara foruma gatnaşmaga çagyrdy. Çäre Türkmenistanyň hemişelik Bitaraplygynyň 30 ýyllygyna şeýle hemTürkmenistanyň başlangyjy boýunça BMG-niň Baş Assambleýasy tarapyndan yglan edilen Halkara parahatçylyk we ynanyşmak ýylyna bagyşlanýar.
Şweýsariýanyň Prezidenti çakylyk üçin hoşallyk bildirip, Türkmenistanyň Bitaraplyk syýasatyna we onuň halkara dialogy berkitmekdäki anyk başlangyçlaryna ýokary baha berdi.
ORIENT
