Türkmenistanyň Bilim ministrligi we ÝUNISEF Inklýuziw bilim tejribesini giňeldýärler
ÝUNISEF Türkmenistanyň Bilim ministrligi we durmuş taýdan goraglylyk pudagyndaky hyzmatdaşlary bilen bilelikde inklýuziw bilimiň ornaşdyrylmagyny ýurduň dürli künjeklerindäki synag mekdeplerde we çagalar baglarynda giňeldýär.
14–20-nji sentýabr aralygynda bu mekdepleriň we çagalar baglarynyň mugallymlary hem-de hünärmenleri milli we halkara bilermenler bilen bilelikde has elýeterli bilim gurşawyny döretmek ugrunda işlediler. Täze çemeleşmeler her bir çaganyň, şol sanda maýyplygy ýa-da aýratyn zerurlyklary bolan çagalaryň deň şertlerde okap, oýnap we ösüş gazanyp biljek synplarynyň hem-de toparlarynyň döredilmegine mümkinçilik berýär.
Bu başlangyjyň çäginde mugallymlar we mekdep müdirleri üçin inklýuziýanyň häzirki zaman usullary boýunça okuwlar guralýar, mekdepler ýörite sazlap bolýan partalar we oturgyçlar bilen enjamlaşdyrylýar, ene-atalaryň bilim prosesine işjeň gatnaşmagy üpjün edilýär. Oýun usullary bilen milli medeni aýratynlyklara laýyklykda çemeleşmek hem möhüm ugurlaryň biri boldy.
Mundan başga-da, aýratyn bilime mätäç çagalary ir tanamak we goldamak ulgamy berkidilýär, bu bolsa olaryň jemgyýete uýgunlaşmagy we ýurdumyzyň bilim edaralarynda mümkinçilikleriniň doly açylmagy üçin goşmaça şertler döredýär.
