Parahatçylyk söýüjilik syýasaty: Rumyniýada Türkmenistanyň hemişelik bitaraplygy baradaky maslahat geçirildi
17-nji sentýabrda Buharestdäki “Politehnika” Milli Ylymlar we Tehnologiýa Uniwersitetinde Türkmenistanyň hemişelik bitaraplygynyň 30 ýyllygyna bagyşlanan halkara maslahat geçirildi. Çäräniň guramaçysy Türkmenistanyň Rumyniýadaky ilçihanasy bolup, ol ýurdumyzyň garaşsyzlygynyň 34 ýyllygyna hem-de 2025-nji ýylyň Halkara Parahatçylyk we Ynanyşmak Ýyly diýlip yglan edilmegine bagyşlandy.
Maslahata diplomatlar, rumyn döwlet we ylmy jemgyýetçiligiň wekilleri, şeýle hem talyplar gatnaşdylar. Çykyş edenler Türkmenistanyň hemişelik bitaraplyk syýasatynyň sebitde we dünýäde parahatçylygy hem-de durnuklylygy berkitmekde möhüm orun eýeleýändigini nygtadylar.
Uniwersitetiň rektory, professor Mihneýa Kostoiu Türkmenistanyň daşary syýasatynyň parahatçylyk söýüjilik häsiýetini belledi. Türkmenistanyň Rumyniýadaky ilçisi A.Annaýew çykyşynda bitaraplygyň ýurdumyzyň daşary syýasatynyň binýady bolup durýandygyny we onuň üç gezek BMG-niň Baş Assambleýasy tarapyndan tassyklanylandygyny aýratyn belledi.
Maslahatda türkmen-rumyn gatnaşyklarynyň ösüş mümkinçiliklerine hem üns berildi, şol sanda:
• Hazar deňzi – Gara deňiz ulag geçelgesi.
• Energetika, sanly tehnologiýalar we ekologiýa ugurlaryndaky hyzmatdaşlyk.
Çäräniň ahyrynda myhmanlar ýörite guralan sergide we milli tagamlary datmak dabarasynda Türkmenistanyň medeniýeti bilen ýakyndan tanyşmaga mümkinçilik aldylar.
ORIENT
