Sanly.tm ygtybarly elektron poçtasy türkmenistanly ulanyjylaryň arasynda meşhurlyk gazanýar
Sanly.tm elektron poçtasy ygtybarly goragy we amatly interfeýsi bilen Türkmenistanda ulanyjylaryň arasynda köpden bäri meşhurlyk gazandy. Bu hyzmat sanly.tm milli portalynyň üsti bilen üstünlikli işleýär we hususy şahslar hem-de korporatiw müşderiler üçin giň mümkinçilikleri hödürleýär.
Sanly.tm milli portaly milli stilde ýerine ýetirilen hem-de türkmen we rus dillerinde elýeterlidir. Ol gündelik iş proseslerini awtomatlaşdyrýar we maglumat alyş-çalyşygy arkaly wagty tygşytlaýar. Portal poçta, senenama, gözleg ulgamy, täzelikler, howa maglumaty we çat ýaly modullary birleşdirýär. Şeýle hem, bu ýerde e.gov.tm döwlet hyzmatlary portalyna salgylanmalar ýerleşdirilendir.
Korporatiw ulanyjylara aýratyn üns berilýär. Sanly.tm korporatiw poçta hyzmaty hukuk şahslary üçin döredilip, iş proseslerini optimizirlemäge mümkinçilik berýär. Hasaba alynandan soň her bir işgär 2 GB möçberli şahsy elektron poçta salgysyna we çäklendirilmedik papkalar döretmek mümkinçiligine eýe bolýar. Zerurlyk ýüze çykan ýagdaýynda, olaryň möçberi artdyrylyp bilner.
Korporatiw poçta hyzmatyny birikdirmek üçin diňe sanly.tm portalynyň üsti bilen arzany ibermek ýeterlikdir. Bu çözgüt kompaniýalaryň bökdençsiz işlemegini we iş toparynyň içinde netijeli hyzmatdaşlyk etmegini üpjün edýär. Häzirki wagtda Sanly.tm gündelik işde we aragatnaşykda giňden ulanylýan serişdeleriň biri bolup durýar.
ORIENT
