Türkmen talyplary Günorta Koreýa hünär tejribeligine ugradylar
Türkmenistan bilen Günorta Koreýanyň dostluk we ynanyşmak ýörelgelerine esaslanýan hyzmatdaşlygy ýurdumyzyň daşary syýasatynyň ileri tutulýan ugurlarynyň biridir. Iki döwlet diňe bir ikitaraplaýyn derejede däl, eýsem BMG-niň hem-de sebit derejesindäki "Merkezi Aziýa – Koreýa Respublikasy" görnüşindäki formatynyň çäklerinde-de işjeň hyzmatdaşlyk edýärler. Bu hyzmatdaşlyk ylmy, bilimi, energetikany, ulag pudagyny, ekologiýany, saglygy goraýşy we medeniýeti öz içine alýan giň ugurlary gurşap alýar.
Bilim ulgamyndaky gatnaşyklary berkitmek maksady bilen, Türkmenistan yzygiderli talyplary daşary ýurtlara okamaga we tejribe geçmäge ugradýar. Ýakynda Döwletmämmet Azady adyndaky Türkmen milli dünýä dilleri institutynyň talyplar topary Günorta Koreýa ugrady. Olar 2025-nji ýylyň 25-nji awgustyndan 2026-njy ýylyň 25-nji iýulyna çenli Koreýanyň Kangwon Milli uniwersitetinde koreý we iňlis dillerini öwrenerler. Bu bolsa iki ýokary okuw mekdebiniň arasynda baglaşylan Özara düşünişmek hakyndaky Ähtnama laýyklykda amala aşyrylýar.
Bu maksatnama talyplaryň dil bilimlerini çuňlaşdyrmak bilen çäklenmän, eýsem olaryň toplanylan tejribelerini peýdalanyp, Türkmenistanda bilim ulgamynda geljekki işlerine taýýarlyk görmegine mümkinçilik berer.
ORIENT
