Ilon Mask bir şert bilen $1 trln alyp biler: Tesla dünýäniň iň gymmat kompaniýasy bolmaly
Tesla-nyň Direktorlar geňeşi, kompaniýanyň gymmadyny ep-esli ýokarlandyrmak şerti bilen, Ilon Maska $1 trln möçberinde baýrak tölemekçi. Bu teklip entek maýadarlar tarapyndan oňaýlanmaly. Muňa görä, Maska pul birbada däl-de, bölek-bölek berler. Ol degişli ykdysady görkezijileriň örän ýokary derejelere ýetirilmegi bilen baglanyşykly bolup, 10 ýylyň dowamynda amala aşyrylar.
Esasy şertler we maksatlar
• Aýlyksyz, diňe paýnamalar. Adaty aýlyk ýa-da baýrak ýerine Mask kompaniýanyň paýnamalaryndan paý alar. Maksatlaryň ýerine ýetirilmegi bilen onuň paýy ýokarlanar.
• Bahanyň iki esse ýokarlandyrylmagy. Ilkinji maksat — Tesla-nyň bazar bahasyny iki esse artdyryp $2 trln ýetirmek.
• Soňky maksat. Ýokary baýrak möçberini almak üçin Mask kompaniýanyň bazar bahasyny $8,5 trln çenli ýetirmeli. Bu bolsa häzirki wagtda dünýäniň iň gymmat kompaniýasy hasaplanýan Nvidia-nyň bahasyndan iki esse köp.
• 12 tapgyr. Baýrak 12 bölege bölünip berler. Her bölek belli bir ykdysady görkeziji bilen baglanyşykly bolar: awtoulaglaryň we robotlaryň önümçiligini artdyrmak, şeýle-de girdejini 24 esse ýokarlandyrmak ýaly.
Näme üçin bu teklip jedel döredýär?
• Howply maýa goýum. Tesla-nyň Direktorlar geňeşiniň başlygy Robin Denholm bu meýilnamanyň “Masky saklamak we höweslendirmek” üçin zerurdygyny aýdýar. Onuň pikiriçe, Mask kompaniýany ilkinji garanyňda “hakykatdan daş” ýaly görünýän maksatlara ýetirip biler.
• “Akyla sygmajak” mukdar. AJ Bell kompaniýasynyň maýa goýum derňewçisi Den Koatswort bu mukdary “akyla sygmajak” diýip atlandyrýar. Ol Maskyň syýasy işjeňligi sebäpli abraýynyň peselendigini, üstesine-de Tesla ýolbaşçylyk edip, onuň bazardaky ornuny ýitirýändigini belleýär.
• Satuwlaryň peselmegi. Tesla-nyň soňky maliýe hasabaty soňky 10 ýylda iň çalt satuwlaryň pese gaçandygyny görkezýär. Şonuň üçin goýlan maksatlara ýetmek örän kyn bolar.
• Ýolbaşçylara soraglar. Koatswort şeýle hem Direktorlar geňeşiniň näme üçin Mask üçin göreşýändigine geň galýar, sebäbi ol özi iş başarmalydy. Mundan ozal Tesla ýolbaşçylarynyň Masky onuň syýasy işjeňligi we paýnamalaryň bahasynyň çalt peselmegi sebäpli işden aýyrmagy mümkin diýlipdi.
Bu teklip, Maskyň Tesla-daky geljegi we kompaniýa edýän täsiri barada dowam edýän çekeleşikleriň bir bölegi boldy. Awgustda Mask eýýäm $29 mlrd möçberinde Tesla-nyň paýnamalaryny aldy we dünýäniň iň baý adamy boldy. Ýöne 2023-nji ýylda ABŞ-nyň kazyýeti ozal hödürlenen, $50 mlrd möçberinde sylag meýilnamasyny “maýadarlar üçin adalatsyz” diýip yglan edipdi.
ORIENT
