Türkmenistan bilen Sloweniýa gepleşikleri giňeldýär: ýokary derejeli duşuşyklardan kino görkezilişlerine çenli
Türkmenistanyň daşary işler ministriniň orunbasary Mähri Bäşimowa Sloweniýa Respublikasynyň Prezidentiniň daşary syýasy meseleler boýunça geňeşçisi Damýan Bergant we Sloweniýanyň Daşary işler ministrliginiň Döwlet sekretary doktor Melita Gabriç bilen gepleşikleri geçirdi. Bled Strategik Forumynyň çäginde geçen duşuşyklar dürli ugurlarda gatnaşyklaryň we hyzmatdaşlygyň giňeldilmegine esas boldy.
Türkmen tarapy Sloweniýanyň Prezidentiniň geňeşçisi Damýan Bergant bilen bolan gepleşikde ýurdumyzyň hemişelik bitaraplygynyň 30 ýyllygynyň belleniljek 2025-nji ýylyň aýratyn ähmiýetini nygtady. Şunuň bilen baglylykda, türkmen wekiliýeti Sloweniýany 12-nji dekabrda Aşgabatda geçiriljek ýokary derejeli halkara maslahatyna gatnaşmaga çagyrdy.
Duşuşykda ýurtlaryň Liderleriniň Nýu-Ýorkda BMG-niň Baş Assambleýasynyň mejlisiniň çäginde duşuşygyny guramak mümkinçiligi hem ara alnyp maslahatlaşyldy. Damýan Bergant Türkmenistanyň ösüşine ýokary baha berip, Sloweniýanyň Aşgabat forumyna doly gatnaşmaga taýýardygyny aýtdy.
Sloweniýanyň daşary işler ministrliginiň Döwlet sekretary Melita Gabriç bilen bolan duşuşykda hyzmatdaşlygy pugtalandyrmak boýunça anyk ädimler kesgitlenildi:
• Diplomatik hyzmatdaşlyk: taraplar daşary syýasat edaralarynyň arasyndaky syýasy geňeşmeleri dowam etdirmäge taýýardygyny tassykladylar. Nobatdaky tapgyry 2026-njy ýylda Lýublýanada geçiriler.
• Ykdysady dialog: iki ýurduň wekilleriniň gatnaşmagynda syýasy geňeşmeler bilen bilelikde işewür duşuşyklary we işewürlik forumlary guramak teklip edildi. Hyzmatdaşlygyň ileri tutulýan ugurlary hökmünde himiýa we energetika pudaklary, farmasewtika, infrastruktura, sport, oba hojalygy we tehnologiýalar görkezildi.
• Medeni alyş-çalyş: slowen tarapy Türkmenistanda slowen filmlerini görkezmek meýilleri barada mälim etdi. Bu bolsa halklaryň arasynda ynsanperwer gatnaşyklary we özara düşünişmegi pugtalandyrmaga ýardam eder.
Söhbetdeşler Sloweniýanyň Türkmenistandaky (hemişelik oturýan ýeri Moskwa) Ilçisiniň Awazada awgust aýynda geçirilen BMG-niň Deňze çykalgasy bolmadyk ösüp barýan ýurtlar boýunça III maslahatynyň (LLDC3) işine gatnaşandygy bellenildi. Maslahatyň ýokary derejede guralandygy we ulag-logistika meselelerini çözmekde möhüm ähmiýetiniň bardygy aýratyn nygtaldy.
ORIENT
