Awstraliýada ýollarda haýwanlary goramak üçin niýetlenen ulgam üstünlikli synagdan geçirildi
Awstraliýada LAARMA atly dünýäniň ilkinji intellektual ulgamynyň synaglary üstünlikli geçirildi. Ol ulaglaryň ýabany haýwanlar bilen çaknyşmagynyň öňüni almak üçin niýetlenendir. Ulgam 97% takyklyk bilen tanamak mümkinçiligini görkezip, eýýäm Kwinslend sebitinde uçmaýan kazuar seýrek guşlarynyň populýasiýasyny gorap saklamaga kömek etdi.
Ulgam ýol gyrasyndaky giňişligi yzygiderli gözegçilikde saklaýan datçikler ulgamyna esaslanýar. Olara kameralaryň, teplowizorlaryň we lidarly skanerleriň toplumy girýär. Maglumatlary özi öwrenýän algoritm işläp, ol haýwanlary tanap bilýär we sürüjiler üçin dinamik ýol belgilere dessine duýduryş iberýär. Bäş aýlap dowam eden synag döwründe ulgam 287 gezek kazuarlaryň peýda bolandygyny ýüze çykardy we ulaglaryň ortaça tizligini 6,3 km/sagat peseltdi.
Işläp taýýarlaýjylar LAARMA ulgamynyň ýok bolup gitmek howpy abanýan görnüşleri goramak üçin aýratyn möhüm ähmiýete eýedigini belleýärler. Olar tehnologiýany dürli haýwanlar üçin uýgunlaşdyrmagy we ony açyk görnüşde elýeterli etmegi meýilleşdirýärler, şeýlelik bilen dünýäniň dürli ýerlerindäki ekologlar gyzyl pandalar we ak bars ýaly görnüşleri goramakda ony ulanyp bilerler. Bilermenleriň pikiriçe, bu çözgüt ýabany tebigat bilen ulag infrastrukturasynyň sazlaşykly gatnaşygy üçin täze bir standarty döredýär.
ORIENT
