ChatGPT «Öwreniş tertibini» hödürledi: AI talyplara göçürmän öwrenmäge kömek eder
OpenAI kompaniýasy ChatGPT-de täze «Öwreniş tertibini» (Study Mode) hödürledi. Bu gural talyplara meseleleri ädim-ädim çözmäge kömek edip, taýýar jogap bermän, gollanma soraglaryny berýär. Bu, AI-yň göçürip öwrenmek üçin ulanylmagyna garşy bir jogap boldy. OpenAI, Study Mode-u «ChatGPT-de okuw işlerini gowulandyrmak üçin uzyn ýolda atylan ilkinji ädim» diýip atlandyrýar.
OpenAI-niň bilim boýunça wise-prezidenti Liya Belskiň sözlerine görä, her üçünji talyp häzirki wagtda ChatGPT-den peýdalanýar. Bu ulanyjylar toparyny dogry ugura gönükdirmek üçin, kompaniýa täze bir tertibi işläp taýýarlady. Ol öý işlerini ýerine ýetirmekde, synaglara taýýarlanmakda we täze temalary öwrenmekde kömek bermäge niýetlenendir.
Taslama mugallymlar, okuwçylar we talyplar bilen bilelikde amala aşdyryldy. «Öwreniş tertibiniň» esasy ýörelgeleri, işjeň gatnaşmagy we öz-özüne gözegçilik etmegi höweslendirýän ýörite görkezmeleri öz içine alýar. Meselem, sorag girizilenden soň, ChatGPT meseläni birnäçe ädime böler we soňra jogaby öz sözleri bilen ýazmagyňyzy haýyş eder.
«Öwreniş tertibi» interaktiw görkezmeleriň esasynda işleýär, ol gollanma soraglary we şahsy goldawy öz içine alýar. Ony islendik wagt açyp we ýapyp bolýar. Bu hem talyplara okuw maksatlaryna ýetmekde hyzmat edýär. Bilermenleriň pikirine görä, şeýle aýratynlyklar — AI-yň bilimde has netijeli ulanylmagy üçin möhüm bir ädimiň başydyr.
Täze tertip, Free, Plus, Pro we Team görnüşleri üçin elýeterlidir. ChatGPT Edu-da bolsa, ol birnäçe hepdäniň içinde peýda bolar.
ORIENT
