Rus öýünde Halkara küşt güni: ussatlyk sapaklary we şol bir wagtyň özünde oýun seanslary
17-nji iýulda Aşgabatdaky Rus öýünde Halkara küşt gününe bagyşlanan ajaýyp çäre geçirildi. Türkmenistanyň Küşt federasiýasy bilen bilelikde guralan intellektual oýun baýramçylygy 7 we ondan uly ýaş küşt höwesjeňlerini bir ýere jemledi.
Myhmanlary Türkmenistanyň Küşt federasiýasynyň ýolbaşçysy Wepa Mälikgulyýew garşy aldy. Ol öz çykyşynda ýaşlaryň arasynda küşt oýnuny ýaýratmagyň we ýaş zehinleri goldamagyň möhümdigini aýtdy.
Maksatnamanyň esasy wakalaryndan biri, Türkmenistan Küşt federasiýasynyň Baş sekretary, erkekler milli toparynyň baş tälimçisi we FIDE ussady Mergen Kakabaýew tarapyndan bir wagtyň özünde geçirilen oýun seansy boldy. Ýetgitjek ýaşdaky gatnaşyjylar ökde hünärmen bilen bäsleşip, tejribeli oýunçy bilen güýçlerini synap görmäge mümkinçilik aldylar.
Çäräniň maksatnamasy şeýle hem öwrediji we kämilleşdiriş sapaklaryny öz içine aldy:
“30 minutda küşt oýnamagy öwreniň” – küşt bilen täze meşgullanyp başlanlar üçin ajaýyp başlangyç.
“Küştiň syrlary” ussatlyk sapaklary” – bu ýerde tejribeli tälimçi oýny kämilleşdirmäge kömek etjek peýdaly usullary we strategiýalary paýlaşdy.
Şeýle hem, gatnaşyjylar tagtada küşt pikirlenmesini, tilsimleri we ynamy ösdürmek boýunça maslahat aldylar.
Bu çäre mähirli we dostlukly ýagdaýda geçirildi, gatnaşyjylaryň hemmesinde ýakymly täsirler bilen birlikde, küşt dünýäsinde mundan beýläk-de ösüş üçin täze bilimi, ylhamy we islegi döretdi.
ORIENT
