Katar 3D gurluşykda ösüş gazandy: dünýäde iň uly mekdep toplumy bina edilýär
Doha şäheriniň çöllüginde möhüm taslama başlandy: umumy meýdany 40 000 m² bolan iki mekdep binasy dolulygyna 3D printer arkaly bina edilýär. Bu binalar toplumynyň goşmaça gurluşyk usuly bilen döredilen dünýäde iň uly toplum bolmagyna garaşylýar we öňki dünýä rekordyndan 40 esse uly bolar. Bu uly maksatly taslamany amala aşyrmak üçin katarly UCC Holding kompaniýasy Jemgyýetçilik işleriniň müdürligi (Ashghal) bilen hyzmatdaşlykda, Daniýanyň COBOD kompaniýasynyň öndürýän iki sany ägirt uly BODXL 3D printerini ulanmaga başlady. Her bir printeriň ululygy Boeing 737 uçarynyňky bilen deň bolup (50x30x15 metr), sagatda 100 m² diwar çap edip bilýär. Taslamanyň tehniki müdiri bu ösüşiň diňe bir ölçeg taýdan däl-de, gurluşyk tehnologiýasynda hil taýdan hem uly öňe gidişligi döredýändigini aýtdy.
3D çap etmek üçin +50°C çenli temperatura çydamly ýörite beton taýýarlanyldy. Materialyň has gowy berkleşmegi üçin çap etmek işleri esasan gijelerine amala aşyrylýar. Her gatlagyň takyk çap edilmegi dronlaryň we datçikleriň ulanylýan awtomatlaşdyrylan gözegçilik ulgamy bilen üpjün edilýär. Adaty gurluşyk usullary bilen deňeşdirilende, bu innowasion tehnologiýa CO₂ zyňyndylaryny 35% azaldýar, gurluşyk möhletini 60% gysgaldýar, galyndylary 75% azaltmaga mümkinçilik berýär we işçi güýjüne bolan islegi 50% azaldýar. COBOD-nyň wekili “biz diňe diwarlary çap etmeýäris — biz inžener ulgamly taýýar arhitektura elementlerini döredýäris” diýip belledi. Binalaryň arhitektura dizaýny “gum depelerine” meňzeş tekiz egrileri öz içine alýar, bu bolsa adaty usullar bilen ýerine ýetirmek üçin gaty kyn gurluşyk çözgüdi. Diwarlaryň galyňlygy ýüküň agyrlygyna görä 30-dan 50 sm-e çenli üýtgeýär.
Bilermenleriň pikirine görä, bu taslama Kataryň gurluşyk innowasiýalarynda öňdebaryjy hökmünde ornuny güýçlendirýär we "akylly" tehnologiýalara geçmegi maksat edinýän Vision 2030 Milli Maksatnamasynyň maksatlaryna doly laýyk gelýär. Kataryň Uniwersitetiniň arhitektura professorynyň pikiriçe, öňümizdäki bäş ýylyň dowamynda sebitleýin täze desgalaryň 15%-e çenli bölegi şu usul bilen bina ediler. Ilkinji mekdebiň 2025-nji ýylyň noýabr aýynda taýýar bolmagyna, 14 binadan ybarat tutuş toplumyň bolsa 2026-njy ýyla çenli tamamlanylmagyna garaşylýar.
ORIENT
