Ilon Mask Grok 4-i hödürleýär: alymlyk derejesindäki mümkinçiligi bolan täze AI nesli
xAI kompaniýasy özüniň emeli aň ulgamynyň dördünji nusgasy bolan Grok 4-i resmi taýdan tanyşdyrdy. Täze model alymlar (PhD) derejesindäki meseleleri çözmek ukybyna eýe bolup, iki görnüşde hödürlenýär: Adaty (Base) nusgasy we Grok 4 Heavy – birnäçe botdan ybarat toparlaýyn iş ýörelgesi esasynda işleýän güýçlendirilen nusgasy.
Grok 4 meşhur Humanity’s Last Exam synagynda 50,7% netijäni görkezdi we Google Gemini 2.5 Pro (22%) hem-de OpenAI GPT-3.5 (21%) modellerinden öňe geçdi. Heavy nusgasy bolsa goşmaça gurallar bilen 44,4% görkezijä eýe bolup, Gemini-niň 26,9%-lyk netijesinden ep-esli ýokary boldy.
Grok 4-iň esasy aýratynlygy — toparlaýyn iş ulgamynyň ornaşdyrylmagy. Bu ýerde birnäçe emeli aň kömekçisi bir wagtda meseleleri çözýär, netije alyşýar we iň gowusyny saýlaýar. Bu usul ýalňyşlyklaryň ähtimallygyny azaltmaga mümkinçilik berýär. Mundan başga-da, Grok 4 brauzer we kody ýerine ýetiriji interpretator bilen utgaşdyrylan ýagdaýda işläp bilýär. Täzelenen sesleri üpjün edýän ulgamy (voice mode) indi has çalt we duýgur ýagdaýa getirilip, AI bilen ulanyjynyň arasyndaky gatnaşygy has tebigy hala öwürýär.
Grok 4 Heavy modeli 2025-nji ýylyň AIME (matematiki olimpiada) synagynda 100% netijäni gazandy. Şeýle-de, ARC-AGI-2 synagynda (wizual nagyşlary tanamak) 16,2% netije bilen täze rekord goýdy – bu görkeziji Claude Opus 4-iň görkezijisinden takmynan iki esse ýokary.
Grok 4-iň adaty nusgasynyň bahasy 30 amerikan dollaryna, güýçlendirilen SuperGrok Heavy nusgasynyň nyrhy bolsa 300 amerikan dollaryna barabardyr. Bu bolsa ony esasy emeli aň hyzmatlarynyň arasynda iň gymmatly nyrh ugruna öwürýär. Abuna ýazylanlar täze aýratynlyklara ir elýeterlilik mümkinçiligini alýarlar: programmirleme modeli (awgust), multimodal agenti (sentýabr), wideo generatory (oktýabr).
Grok 4-iň işe girizilmegi ýakynda Grok awtomatiki akkaundynyň X (ozalky Twitter) sosial ulgamyndaky anti-semitizm häsiýetli teswirleri bilen baglanyşykly bolan abraý töwekgelçilikleriň netijesinde bolýar. Tehniki üstünliklerine garamazdan, bu wakalar AI-çözgütleriniň ygtybarlylygy we öňünden belli bolmagy örän möhüm bolan korporatiw müşderileriň arasynda Grok 4-iň öňe sürülmegi üçin päsgelçilik döredip biler.
ORIENT
