Halkara nebit we gaz uniwersitetiniň talyplary Hytaýda hünär tejribeligini geçýärler
Ýagşygeldi Kakaýew adyndaky Halkara nebit we gaz uniwersitetiniň talyplar topary Pekindäki Hytaýyň nebit uniwersitetinde okuw-önümçilik tejribeligini geçýärler. Tejribelik 20-nji iýundan 20-nji iýula çenli dowam edip, nebitgaz pudagyndaky öňdebaryjy tejribe hem-de tehnologiýalary bilen tanyşmaga gönükdirilendir.
Tejribelik 2023-nji ýylda Halkara nebit we gaz uniwersiteti bilen Hytaýyň milli nebitgaz korporasiýasynyň hem-de Hytaýyň nebit uniwersitetiniň (Pekin) arasynda gol çekilen özara düşünişmek hakynda Ähtnamanyň çäklerinde guraldy. Esasy maksady Türkmenistanyň nebitgaz pudagy üçin ýokary taýýarlykly işgärleri taýynlamakdan hem-de öňdebaryjy pudaklaýyn ýokary okuw mekdepleriniň daşary ýurt tejribeisni öwrenmekden ybaratdyr.
Hytaýyň nebit uniwersiteti türkmen talyplary üçin ýörite üç hepdelik maksatnamasyny taýynlady. Ol umumy sapaklardan, barlaghana we okuw merkezlerine ekskursiýalardan, şeýle hem Hytaýyň milli nebitgaz korporasiýasynyň (CNPC) önümçilik desgalaryna baryp görmekden durýar.
Hünär taýýarlykdan başga-da, türkmen talyplary hytaý dili we medeniýeti boýunça, şeýle hem “Ýaşyl energetika we uglerod zyňyndylarynyň azaldylmagy”, “Nebitiň we gazyň geljegi”, “Ýüpek ýolunda energetika hyzmatdaşlygy” ýaly energetika babatda möhüm temalar boýunça gysgamöhletleýin okuwlara hem gatnaşarlar.
Mundan başga-da, şu ýylyň iýun-iýul aýlarynda Halkara nebit we gaz uniwersitetiniň ikinji talyplar topary Türkmenistandaky CNPC “International Ltd” bölümçesiniň desgalarynda tomusky tejribeligini geçýärler.
Şeýle tejribe alşylmagy geljekki hünärmenleriň hünär taýdan ösmegine hem-de nebitgaz pudagynda halkara hyzmatdaşlygyň pugtalandyrylmagyna ýardam edýär.
ORIENT
