PNG 20 ýylyň içinde ilkinji uly täzelenişini alýar: HDR, Animasiýa we Exif üpjün edilşi
Internetde suratlar üçin standart hökmünde giňden ulanylýan PNG formaty, 2003-nji ýyldan bäri ilkinji uly täzelenişini aldy. Indi ol resmi taýdan HDR suratlary, APNG animasiýasy we Exif metamaglumatlary bilen doly üpjün edilip, şol bir wagtda-da öz köpugurlylygyny we häzirki zaman grafiki formaty derejesini saklaýar.
HDR – bu täzelenişiň esasy aýratynlyklarynyň biri bolup, reňkleriň we ýagtylygyň has giň diapazonyny görkezmäge mümkinçilik berýär, bu bolsa adam gözüniň kabul edýän görnüşine has ýakyn bolýar. HDR maglumatlaryny saklamak üçin diňe dört goşmaça baýt gerek bolýar.
Mozilla tarapyndan ilkinji gezek teklip edilen we häzirki wagtda köp brauzer tarapyndan ulanylýan APNG animasiýa formatynyň PNG standartyna goşulmagy-da möhüm ädimdir. Indi animirlenen PNG faýllary, hil taýdan ýitgisiz gysyş bilen, GIF-iñ doly alternatiw görnüşi bolar.
Mundan başga-da, PNG formaty indi Exif metamaglumatlaryny (awtorlyk, kamera sazlamalary, geolokasiýa) göni özünde saklap bilýär. Mundan ozal bu maglumatlary diňe daşary gurallar arkaly goşmak mümkindi. Indi bolsa, bu maglumatlar JPEG faýllaryndaky ýaly aňsatlyk bilen ornaşdyrylyp we saklanyp bilner.
Täze standart eýýäm häzirki zaman brauzerleriniň köpüsi (Chrome, Safari, Firefox), operasion ulgamlary (iOS, macOS) we programmalar (Photoshop, DaVinci Resolve) tarapyndan üpjün edilýär diýip, How-To Geek habar berýär. Ulanyjylardan goşmaça hiç hili hereket talap edilmeýär.
PNG döredijiler topary geljek täzelenişleri hem yglan etdi: 4-nji wersiýada HDR we adaty suratlaryň utgaşygyny kämilleşdirmek, 5-nji wersiýada bolsa gysyş algoritmlerini optimizirlemek we faýllary parallel işlemek ýaly mümkinçilikleri goşmak meýilleşdirilýär.
ORIENT
