Microsoft Windows 11 25H2 synag görnüşini döretdi
Microsoft Windows 11 25H2 operasiýa ulgamynyň ilkinji synag görnüşini döretdi, ol eýýäm öňünden synag maksatnamasynyň gatnaşyjylary üçin elýeterli boldy. Bu operasiýa ulgamynyň durnukly görnüşi şu ýylyň güýzünde çykar.
Windows 11 25H2, 24H2 bilen bir platforma esaslanýar we ikisi hem bir hyzmat şahasyny ulanýar. Bu bolsa ulanyjylar üçin täzelenme prosesini ep-esli ýeňilleşdirýär: Windows 11 24H2-den 25H2-e geçmek adaty toplumlaýyn täzelenmäni gurmak bilen deň wagtda dowam eder. Ulgamyň faýllary täzeden ýazylmaz we tutuş proses – ýükleme, gurnamak we täzeden işe girizmek – bary-ýogy birnäçe minut alar. Bu ýagdaý Windows 11 23H2-den 24H2-e geçiş bilen deňeşdirilende düýpgöter tapawutlydyr, sebäbi öňki geçişde ulgamyň birnäçe esasy komponentleriniň täzeden ýazylmagy talap edilýärdi we bu has köp wagt alýardy.
Bir platforma esaslanyp işlenilmegi sebäpli, Windows 11 25H2 we 24H2 meňzeş täze aýratynlyklara eýe bolup biler. Bu usul Microsoft üçin täze däl – 2023-nji ýylda 23H2 täzelenmesi bilen hem şeýle ýagdaý bolupdy. Işlemek möhletine gelende bolsa, Windows 11 25H2 korporatiw müşderiler üçin 36 aý, adaty ulanyjylar üçin bolsa 24 aý dowam eder.
Häzirki wagtda Windows 11 25H2-niň synag görnüşinde täze aýratynlyklar ýa-da uly üýtgeşmeler ýok; üýtgeşmeler sanawy soňky Windows 11 24H2 synag görnüşi bilen meňzeş. Şeýle-de bolsa, çeşmelere görä, diňe Windows 11 25H2 üçin niýetlenen aýratyn funksiýalaryň indiki hepdelerde synag ýygnanşyklarynda peýda bolmagyna garaşylýar. Operasiýa ulgamynyň durnukly görnüşiniñ sentýabr-oktabr aýlarynda ýaýramagyna garaşylýar.
ORIENT
