WWDC 2025: Apple “Suwuk aýna” estetikasyny we operasiýa ulgamynyň täze dizaýnyny hödürleýär
9–13-nji iýunda geçirilýän sabyrsyzlyk bilen garaşylan WWDC 2025 maslahatynda Apple kompaniýasy operasiýa ulgamlarynyň täze dizaýnyny resmi taýdan tanyşdyrýar. Esasy üns iPhone üçin niýetlenen iOS 19 (ýa-da mümkin bolan ady bilen iOS 26) ulgamyna gönükdirilen bolsa-da, üýtgeşmeler kompaniýanyň ähli platformalaryna degişlidir.
Esasy täzelik — ulanyjy interfeýsiniň “suwuk aýna” (Liquid Glass) estetikasyna laýyklykda düýpli täzeden işlenmegidir. Bu giň gerimli täzeden dizaýn etmegiň maksady — dürli Apple enjamlarynyň arasynda geçişi mümkin boldugyça amatly we utgaşykly etmek hem-de ulanyş tejribesini bitewileşdirmek we intuitiw ýagdaýa getirmek.
Bloomberg žurnalisti Mark Gurmanyň maglumatlaryna görä, Apple bu tanyşdyryş çäresinde “suwuk aýna” atly düýbünden täze interfeýs elementlerini görkezýär. Bu bolsa, täze operasiýa ulgamlarynda ýarym aç-açan aýna görnüşindäki elementleriň, ýagtylygyň we şöhleleriň dinamiki täsirleriniñ giňden ulanylýandygyny aňladýar.
Ulanyjylar iOS 19 ulgamynda ähli adaty interfeýs elementleriniň şöhlelendiriji we aýna ýüzlüklere eýe bolmagyna garaşyp bilerler. Bu täzelikler düwmeleri, gurallar panelini we sahypa panellerini öz içine alýar, olara döwrebap we ýeňil görnüş berýär. Şeýle-de, esasy ekrandaky programmalaryň belgileri täzeden işlenýär: olar has tegelek görnüşe gelip, gyralarynda ýalpyldawuk şöhleleri öz içine alýarlar.
Apple kompaniýasynyň beýleki platformalary — macOS, watchOS, iPadOS we tvOS hem şeýle täzelikleri alýar. Olaryň dizaýny “suwuk aýna” estetikasyna utgaşykly bolup, ähli enjamlarda bir bitewi stil we işleýişi üpjün edýär. Şol bir wagtyň özünde bolsa, Apple her bir enjam görnüşi üçin aýratyn gurluşy, nawigasiýany we ulanyş aýratynlygyny saklap galýar, bu bolsa her enjamyň mümkinçilikleriniň iň oňat derejede peýdalanylmagyny üpjün edýär.
ORIENT
