Türkmenistan 40-njy Seul Halkara syýahatçylyk ýarmarkasynda syýahatçylyk mümkinçiliklerini görkezýär
Türkmenistanyň syýahatçylyk kompaniýalary Türkmenistanyñ Koreýa Respublikasyndaky ilçihanasy bilen bilelikde 2025-nji ýylyň 5-8-nji iýuny aralygynda geçirilýän 40-njy Seul Halkara syýahatçylyk ýarmarkasyna gatnaşýarlar. Bu barada Türkmenistanyñ Koreýa Respublikasyndaky ilçihanasy habar berýär.
Türkmenistanyň milli stendi ýurduň baý medeni mirasyny görkezýär. Onda milli el işleri, şeýle hem Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan ýazylan kitaplar görkezilýär.
Stendiň myhmanlaryna Türkmenistanyň syýahatçylyk mümkinçilikleri we taryhy ýadygärlikleri, tebigy gözellikleri, medeni desgalary ýaly birnäçe ajaýyp ýerleri görkezilýär. Şeýle-de, myhmanlar türkmen milli tagamlaryndan we süýjilik önümlerinden dadyp gördüler.
Sergide Türkmenistana “Aşgabat syýahat”, “Bagtyýar dostlar”, “Hazar ugry” we “Owadan syýahat” ýaly meşhur syýahatçylyk kompaniýalary, şeýle-de başga-da birnäçe kompaniýa wekilçilik edýär.
Sergä gatnaşmak, Türkmenistanyň özüniň özboluşly medeni aýratynlygyny dünýä ýaýmak hem-de Koreýa Respublikasy bilen halkara syýahatçylyk hyzmatdaşlygyny pugtalandyrmak islegini açyp görkezýär.
Seulyñ Halkara syýahatçylyk ýarmarkasy (SITF) — bu Koreýa Respublikasynda her ýyl geçirilýän möhüm halkara çäre bolup, dünýä ýurtlarynyň syýahatçylyk mümkinçiliklerini tanyşdyrmaga şert döredýär. Ýarmarka halkara syýahatçylygyň, medeni alyş-çalyşygyň we syýahatçylyk ugrunda işewür hyzmatdaşlygyň ösmegine ýardam berýär.
ORIENT
