GeForce RTX 5050: Acer noutbuklarynyň aýratynlyklarynda täze wideo karty ýüze çykdy
Acer kompaniýasy heniz NVIDIA tarapyndan resmi taýdan hödürlenmedik ykjam wideo karty GeForce RTX 5050 barada ilkinji maglumatlary paýlaşdy. Täze kart eýýäm birnäçe öndürijiniň noutbuklarynyň tehniki häsiýetlerinde görkezildi. Häzirki wagtda grafiki prosessor (çaklanylmagyna görä GB206 ýa-da GB207), CUDA ýadrolarynyň sany we wideo ýadyň möçberi barada anyk maglumat ýok. Şeýle-de bolsa, ozalky ýaýradylan maglumatlarda bu kartyň 8 GB GDDR7 ýady bilen gelýändigi agzalypdy.
Acer öz resmi sahypasynda RTX 5050 kartynyň grafiki prosessorynyň ýygylygy we energiýa sarp ediş derejesi (TGP) baradaky maglumatlary ýerleşdirdi. RTX 5050, RTX 5070 Ti / RTX 5070 we RTX 5060 kartlary bilen birlikde Nitro seriýasynyň noutbuklarynda elýeterli bolar. Emma häzirki wagtda Acer Predator modellerinde bu kartyň peýda bolmagyna garaşylmaýar.
RTX 5050 karty iň azyndan bäş dürli TGP konfigurasiýasynda hödürlener:
-
50 Wt (60 Wt çenli) — ýygylyk 1500 MHz çenli (Acer OC tertibinde 1600 MHz);
-
60 Wt (75 Wt çenli) — ýygylyk 1905 MHz çenli (Acer OC: 1905 MHz);
-
70 Wt (85 Wt çenli) — ýygylyk 2212 MHz çenli (Acer OC: 2313 MHz);
-
80 Wt (95 Wt çenli) — ýygylyk 2212 MHz çenli (Acer OC: 2312 MHz);
-
100 Wt (115 Wt çenli) — ýygylyk 2550 MHz çenli (Acer OC: 2650 MHz).
RTX 5050 kartynyň öňki nesli bolan RTX 4050 üçin göni çalşygy bolmagyna garaşylýar, ýöne Acer käbir modellerde öňki nesliň kartyny hödürlemegini dowam etdirer. RTX 5050 kartynyň resmi çykarylyş senesi entek yglan edilmedi.
ORIENT
