Dostlugyň aýdyň ýollary: Tbiliside türkmeniň halyçylyk sungaty bilen tanyşýarlar
Tbilisidäki “Ahundowyň öýi” galereýasyn 23-nji maýda Türkmenistanyň we Azerbaýjanyň ajýyp halyçylyk sungatynyň ýaýbaňlandyrylan ýerine öwrüldi. Iki ýurduň milli haly baýramlaryny birleşdirip, Türkmenistanyň we Azerbaýjanyň Gruziýadaky ýerleşýän ilçihanalary Merkezi Kawkaz bilen çuňňur taryhy we medeni gatnaşyklary görkezýän bilelikdäki sergini gurnady.
Açylyş dabarasyna diplomatik korpusyň, Gruziýanyň parlamentiniň, ministrlikleriň we edaralaryň, Tbilisiniň häkimliginiň wekilleri, žurnalistler, medeniýet işgärleri hem-de Gruziýada okaýan türkmen talyplary gatnaşdy.
Myhmanlara täsin el hünäri: üýtgeşik halylar we haly önümleri, ajaýyp milli şaý-sepler, özboluşly ýadygärlik sowgatlary, bezeg we amaly-haşam sungat eserleri we suratlar hödürlendi.
Türkmenistanyň Gruziýadaky Adatdan daşary we Doly ygtyýarly Ilçisi wekili Döwletmyrat Seýitmämmedow ýygnananlara ýüzlenip türkmen halysyny dokamak işi – bu diňe bir senet däl, eýsem halkyň ruhuny, ruhy gymmatlyklaryny, däp-dessurlaryny hem-de adatlaryny özünde jemleýän gadymy sungatdyr diýip belledi. Ol milli mirasy gorap saklamagyň aýdyň mysaly hem-de bu täsin medeni mirasa çuňňur hormat goýmagyň nyşany bolan Türkmen halysynyň baýramy her ýylyň maý aýynyň soňky ýekşenbesinde bellenilýändigini aýtdy.
Ilçi Türkmenistanyň milli halyçylyk sungatynyň ÝUNESKO-nyň Adamzadyň maddy däl medeni mirasynyň sanawyna goşulandygyny buýsanç bilen belläp geçdi. Şeýle hem bu sergi Parahatçylyk we ynanyşmak ýylyna we Türkmenistanyň hemişelik Bitaraplygynyň 30 ýyllygyna bagyşlanýar diýip belledi. Haly nagyşlarynyň ýurduň döwlet nyşanlaryna ýerleşdirilmegi türkmenleriň ata-babalarynyň öwüt-nesihatlaryna ygrarlydygyny, milli ruhuň dowamlylygyny we ýagty geljege bolan ynamyny alamatlandyrýar.
Çykyş edenler medeni mirasy wagyz etmek we halklaryň arasyndaky dostlugy berkitmek üçin şular ýaly bilelikdäki taslamalaryň möhümdigini nygtadylar.
Sergi 27-nji maýa çenli dowam eder we hemmäni bu ajaýyp sungaty görmäge çagyrýar.
ORIENT
