“Galkynyş” milli at üstündäki oýunlar topary Stambuldaky etnosport festiwalynda şöhle saçýar
22-nji maýda Stambul şäherinde bütin dünýäde meşhur çärä öwrülen 7-nji Halkara etnosport medeniýeti festiwaly badalga aldy. Bütindünýä Etnosport Konfederasiýasy tarapyndan gurnalan bu çäre, 35 ýurduň wekilleriniň gatnaşmagynda “Atatürk” howa menziliniň çäginde geçirilýär. Festiwalyň çäklerinde dürli ýurtlardan gelen milli medeni toparlar, olaryň däp-dessurlary, at üstündäki oýunlary we milli sport görnüşlerini giňden ýaýbaňlandyryldy.
Bu medeni dürlüligiň şöhle saçýan ýyldyzy, meşhur “Galkynyş” milli at üstündäki oýunlar toparynyndan türkmen çapyksuwarlary boldy. Rowaýata öwrülen ahal-teke atlarynyň üstündäki ýigitler öz ussatlyklary bilen tomaşaçylary haýran galdyrdy.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy bilen döredilen “Galkynyş”topar – bu diňe bir ajaýyp çykyş däl, bu türkmen topragynda dörän milli mirasyň we hakyky sungatyň dowamydyr. Toparyň her bir çykyşy – çapyksuwarlaryň dünýä giňişliginde buýsanç bilen görkezýän Türkmenistanyň baý atçylyk medeniýetiniň aýdyň subutnamasydyr.
“Galkynyş” toparynyň agzalarynyň at üstündäki oýunlary ýerine ýetirmekde görkezen ýokary ussatlyklary tomaşaçylary hem-de halkara myhmanlary haýrana goýdular. Türkmenistandan ýörite getirilip görkezilen ahalteke atlary tomaşaçylaryň aýratyn ünsüni çekdiler. Owadanlygy, çydamlylygy we özboluşly hereketleri bilen tanalýan bu meşhur atlar festiwalyň iň köp ünsüni çeken nyşanlarynyň birine öwrüldi.
Bu köp öwüşgünli halkara çäresi diňe bir Türkmenistanyň özboluşly atçylyk mirasynyň dabaraly görkezilişine öwrülmän, eýsem dürli ýurtlaryň halklarynyň arasyndaky dostlugy we medeni gatnaşyklary berkitmekde hem möhüm ähmiýete eýe boldy.
ORIENT
