Tiz täsir edýän gulluklaryň instruktorlary taktiki lukmançylyk boýunça hünär derejelerini ýokarlandyrdylar
Aşgabatda ÝHHG-niň guramagynda instruktorlar üçin üç günlük taktiki lukmançylyk okywy üstünlikli tamamlandy. Okuwa Türkmenistanyň Serhet gullugynyň sebitlerde işleýän we adatdan daşary ýagdaýlarda, halas ediş operasiýalarynda ilkinji kömegi görkezýän işgärlerinden hem-de Serhet gullugynyň Merkezi hassahanasynyň lukmanlaryndan jemi 31 adam gatnaşdy.
Okuwyñ baş maksady lukmançylykdan öňki gyssagly kömegi bermek we dürli adatdan daşary ýagdaýlara netijeli täsir etmek boýunça amaly başarnyklary kämilleşdirmekden ybarat boldy. Gatnaşanlar çylşyrymly tebigy we howa şertlerinde bolup biljek şikesler boýunça kömek bermek usullaryny simulýasiýa arkaly öwrenip, ýürek-öýken reanimasiýasy we ýaralananlary daşamak boýunça usullary hem özleşdirdiler.
ÝHHG-niň Aşgabatdaky Merkeziň ýolbaşçysy Jon MakGregor okuwy açmak bilen, dürli howa we geografik şertlerde gulluk edýän serhetçileriň saglygyna we howpsuzlygyna aýratyn töwekgelçilikleriň abanýandygyny nygtady. Ol taktiki lukmançylyk boýunça bilimleriň, wagtynda lukmançylyk kömegini bermek kyn bolan ýagdaýlarda örän möhüm bolup bilýändigini belläp geçdi.
Okuw halkara hünärmeniň ýolbaşçylygynda, sebite laýyklykda uýgunlaşdyrylan amaly we simulýasiýa esasynda geçirildi.
Bu okuw Germaniýanyň hökümetiniň maliýe goldawy bilen amala aşyrylýan ÝHHG-niň býujetinden daşary «Türkmenistanyň Döwlet serhet gullugynyň mümkinçiliklerini pugtalandyrmak» atly taslamasynyň çäginde guraldy.
ORIENT
