Türkmenistan “InterFood Azerbaijan-2025” sergisinde gatnaşdy
Türkmenistanyň azyk senagatynyň önümleri 2025-nji ýylyň 13-16-njy maýy aralygynda Bakuda geçirilen Hazar sebiti boýunça azyk, içgi önümleri we olaryň önümçiligi üçin çig mal boýunça 30-njy halkara sergisi “InterFood Azerbaijan-2025” atly sergide görkezildi. Dünýäniň onlarça ýurdunyň azyk öndürijilerini birleşdirýän bu serginiň maksady — ýokary hilli harytlary bazara çykarmak we gatnaşyjylar bilen myhmanlaryň arasynda gönüden-göni aragatnaşyklary ýola goýmakdan ybaratdyr.
Sergide konditer we et önümleri, gök önümler we miweler, süýt önümleri, et-süýt önümleri, miweli suwlary, çaý, temmäki, datly tagamlar we beýleki iýmit önümleri bilen bir hatarda miwe-gök önümleri gaýtadan işleýän enjamlary, bellik goýujy enjamlar we beýleki enjamlar giňden görkezildi. Sergide görkezilýän täze tehnologiýalar we innowasion çözgütler azyk senagatynyň ösüşi hem-de işewürlik gatnaşyklarynyň giňeldilmegi üçin amatly mümkinçilikleri döredýär.
Sergi gatnaşyjylara sowallary bermäge, önümleri dadyp görmäge, pikir alyşmaga, özara gatnaşyklary ýola goýmaga hem-de ösüp barýan azyk senagatynda täze gözýetimleriñ şaýady bolmaga mümkinçilik berýän baý goşmaça çäreler maksatnamasy bilen hem tapawutlanýar. Şol çäreleriň çäklerinde B2B görnüşindäki duşuşyklar meýilleşdirilip, hyzmatdaşlygyň we paýlaýyş ulgamynyň täze mümkinçiliklerini ara alyp maslahatlaşmak üçin goşmaça platforma hökmünde hyzmat edýär.
“InterFood Azerbaijan” sergisiniň çäginde Azerbaýjan Aşhana ünärmenleriniň birleşigi tarapyndan guralýan däp bolan halkara aşhana çempionaty — “Altyn Şah 2025” hem geçirilýär. Bu çempionata kyrka golaý topar hem-de 300-den gowrak aşpez gatnaşýar. Çempionatyň emin agzalary 16 ýurtdan gelen Bütindünýä aşhana bileleşikleriniñ guramasynyň ygtyýarnamaly baş aşpez-eminlerinden ybaratdyr diýip, serginiň resmi sahypasynda habar berilýär. “Altyn Şah” çempionaty serginiň iň möhüm wakalarynyň biri hökmünde atlandyrylýar.
Serginiň guramaçysy hökmünde Caspian Event Organisers kompaniýasy hem-de onuň birnäçe daşary ýurtly hyzmatdaşlary çykyş edýär.
