Türkiýe Respublikasynda Halkara parahatçylyk we ynanyşmak ýylyna bagyşlanan ylmy konferensiýasy geçirildi
2025-nji ýylyň 16-njy maýynda Türkmenistanyň Türkiýedäki Ilçihanasy Alaniýa şäheriniň uniwersiteti bilen bilelikde gurnamagynda Türkmenistanyň Hemişelik Bitaraplygynyň 30 ýyllygyna, şeýle hem 2025-nji ýylyň «Halkara parahatçylyk we ynanyşmak ýyly» diýlip yglan edilmegi mynasybetli ylmy konferensiýasy geçirildi.
Geçirilen ylmy çärä Türkiýe Respublikasynyň Alaniýa şäheriniň häkimi Fatih Ýürkmezer, Alaniýa uniwersitetiniň rektory, professor Aýkut Ekenji, Türkiýäniň jemgyýetçilik-syýasy edaralarynyň, döredijilik we ylmy jemgyýetçiligiň wekilleri, talyp ýaşlar we köpçülik habar beriş serişdeleri wekilleri gatnaşdy.
Şunda 2025-nji ýylda Türkmenistanyň hemişelik Bitaraplygynyň 30 ýyllygynyň bellenilýändigine, bu ýylyň «Halkara parahatçylyk we ynanyşmak ýyly» diýlip yglan edilmegine aýratyn üns çekildi. Munuň özi Türkmenistanyň ählumumy parahatçylygy, howpsuzlygy we durnukly ösüşi üpjün etmäge gönükdirilen işleriniň ykrar edilýändiginiň aýdyň güwäsine öwrüldi.
Maslahata gatnaşyjylar öz çykyşlarynda, Türkmenistanyň başlangyjy esasynda BMG-niň Baş Assambleýasy tarapyndan kabul edilen «2025-nji ýyl – Halkara parahatçylyk we ynanyşmak ýyly» atly Kararnamanyň, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan yglan edilen «Dialog – parahatçylygyň kepili» atly halkara gatnaşyklarynyň filosofiýasynyň amaly beýanyna öwrülendigini bellediler.
Şeýle hem, maslahata gatnaşyjylar Bitaraplygyň 30 ýyllygyna bagyşlanan ýörite taýýarlanylan wideo ýazgylara tomaşa etdiler we 2025-nji ýylyň dekabrynda Türkmenistanda bu möhüm senä bagyşlanyp geçiriljek halkara forumynyň taýýarlyk işleri bilen tanyşdylar.
Bulardan başgada, maslahatyň çäginde Türkmenistanyň Prezidenti Serdar Berdimuhamedowyň we Türkmen Halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň kitaplarynyň sergisi guraldy.
Çäräniň ahyrynda Türkmenistanyň Türkiýe Respublikasyndaky Ilçihanasy tarapyndan Alaniýa uniwersitetiniň kitaphanasyna Türkmenistanyň Prezidentiniň we Türkmen Halkynyň Milli Lideri, Türkmenistanyň Halk Maslahatynyň Başlygynyň türk dilinde neşir edilen kitaplarynyň nusgalary sowgat berildi.
Mundan başga-da, Alaniýa şäherinde geçirilen çäreleriň çäklerinde Türkmenistanyň Türkiýedäki Ilçisi M.Işangulyýew Alaniýanyň häkimi Fatih Ýürkmezer we Alaniýa uniwersitetiniň rektory Aýkut Ekenji bilen duşuşyklary geçirildi.
ORIENT
