Goturdepe käninde senagat möçberindäki nebit akymy alyndy
«Türkmengeologiýa» Döwlet konserniniň «Lebapnebitgazgözleg» ekspedisiýasynyň işgärleriniň nobatdaky üstünligi — Goturdepe käniniň günbatar böleginde burawlan 1907 belgili gözleg guýusyndan senagat möçberinde nebit akymynyň alynmagy boldy. Ekspedisiýanyň baş geology Sünnet Hatamowyň sözlerine görä, Türkmenistanyň sebitlerinde, şol sanda Balkan welaýatynda geologik-gözleg işleri işjeň ýaýbañlanýar. Munuň netijesinde gymmatly çig malyň ätiýaçlyk gorlary artýar we ýurduň tebigy serişdeleri köpelýär.
Lebaply geologiýa gözlegçiler agzalan kände takmynan 4 müň metr çuňlukda buraw işleri geçirip, bu meýdançadaky iň çuň guýyny döretdiler. Netijede, aşaky gyzyl gatlagyň 13-nji gözýetiminde baý nebit we tebigy gaz gatlagy açyldy. Hünärmenleriň hasaplamalaryna görä, guýynyň öndürijiligi bir gije-gündizde 93,4 tonna çig nebite we 4430 kub metr tebigy gaza barabardyr. Gözleg işleriniň üstünlikli tamamlanmagy, bu känleriň gymmatly tebigy serişdeleriň çykarylmagy üçin uly mümkinçilikleriniň bardygyny aýdyň görkezýär.
«Türkmenmetbugat» agentliginiň maglumatyna görä, ýurdumyz üçin ähmiýetli bolan Bitaraplygyň 30 ýyllygy bellenilýän ýylynda gazanylan bu zähmet üstünligi buraw desgasynyñ başlygy Jumageldi Orazowyň we onuň ýokary derejeli hünärli hem-de tejribeli toparynyň utgaşykly işiniň netijesi boldy. Olaryň arasynda, ilkinji nobatda, buraw ussasy Magtymguly Mahmudowy, baş geolog Mamurjan Çaryýewy, burawçy Töre Bazarowy, burawçynyň kömekçileri Gahryman Gurtgeldiýewi, Artyk Öwezgulyýewi we beýlekileri agzamak bolar. Pudagyñ öñünde duran wezipeleri durmuşa geçirmek ugrunda işjeň zähmet çekýän burawçylar şu ýyl şeýle begençli habarlaryň sanynyň has-da köpeljekdigine ynam bildirýärler.
ORIENT
