Türkmenistan bilen Günorta Koreýa atçylyk we atçylyk medeniýeti ulgamynda hyzmatdaşlyk barada maslahatlaşdylar
Türkmenistanyň Koreýa Respublikasyndaky Adatdan daşary we Doly ygtyýarly Ilçisi Begenç Durdyýew Kyongido welaýatynyň Koyang şäherindäki Koreýanyň at münmek medeniýeti boýunça ylmy-barlag institutynyň direktory Ko Son Kýu bilen duşuşyk geçirdi. Duşuşygyň esasy temasy atçylyk pudagynda ikitaraplaýyn hyzmatdaşlygy ösdürmek we atçylyk medeniýeti boýunça tejribe alyşmak boldy.
Duşuşygyñ dowamynda Ilçi Durdyýew koreýaly kärdeşine Türkmenistanyň Prezidentiniñ we türkmen halkynyň Milli Lideriniň ýolbaşçylygynda ýurdumyzda atçylyk pudagyny ösdürmek we atçylyk sporty giňden wagyz etmek ugrunda alnyp barylýan başlangyçlar barada giňişleýin gürrüň berdi. Şeýle hem, ol "Türkmenatlary” döwlet birleşigi we Arkadag şäherinde ýerleşýän Aba Annaýew adyndaky Halkara atçylyk akademiýasynyň işi barada maglumat berdi.
Ilçi Durdyýew halkara hyzmatdaşlygyň ösüşiniň möhümdigini belläp, at münmek medeniýeti boýunça Koreýada tanalýan bilermen jenap Ko öz ýurduny Halkara ahalteke atçylyk birleşiginde wekilçilik etmek mümkinçiliklerini göz öňünde tutmagy teklip etdi.
Öz gezeginde, jenap Ko Son Kýu Türkmenistanda atçylyk sportynyň ösüşine berilýän üns üçin çyn ýürekden hoşallygyny bildirdi. Ol 2016-njy ýylda Türkmen bedewiniň Milli baýramyna gatnaşan wagtyndaky täsirli ýatlamalaryny ýatlap, ahalteke atlarynyň özboluşly häsiýetleri we gözelligi barada aýratyn buýsanç bilen aýtdy. Koreýaly bilermen bu ugurda Türkmenistan bilen geljekki hyzmatdaşlygyň ösdürilmegine, şol sanda Halkara ahalteke atçylyk birleşigine goşulmak başlangyjyna uly gyzyklanma bildirdi.
Şeýlelikde, duşuşyk Türkmenistan bilen Koreýa Respublikasynyň arasynda taryhy taýdan möhüm we ähmiýetli ugur bolan atçylyk we atçylyk medeniýeti babatda hyzmatdaşlygyň giňeldilmegine bolan özara gyzyklanmany görkezdi we bilim hem-de tejribe alyşmak üçin täze mümkinçilikleri açdy.
ORIENT
