Mähir bilen gurşap almak: Minskde geçirilen duşuşyk hemaýata mätäç çagalara kömek bermäge bagyşlandy
Minskde Mümkinçiligi çäkli çagalara niýetlenen respublikan dikeldiş merkezinde aýratyn bir duşuşyk geçirildi. Türkmenistanyň Belarus Respublikasyndaky ilçisi Nazarguly Şagulyýew Merkeze baryp görüp, onuň direktory Lýudmila Kondraşowa bilen duşuşdy. Söhbetdeşlige GDA-nyň Ýerine ýetiriji komitetiniň wekili Ýelena Şamal hem gatnaşdy.
Bu duşuşyk iň möhüm zada – çagalar barada edilýän alada bagyşlandy. Merkeziň direktory Lýudmila Kondraşowa Ilçä Merkeziň mümkinçiligi çäkli çagalara, nerw-myşsa we daýanç-hereket ulgamynyň keselleri sebäpli aýratyn hemaýata mätäç bolanlara nähili kömek edýändigi hakynda uly höwes bilen gürrüň berdi. Merkezde 3 ýaşdan 18 ýaşa çenli çagalara täze mümkinçilikleri tapmaga we durmuşda uýgunlaşmaga ýardam edýän toplumlaýyn kömek berilýär.
Bu ýerde diňe bir bejeriş işleri geçirilmeýär. Merkeziň hünärmenleri her bir çaga aýratyn çemeleşýärler, onuň mümkinçiliklerini seljerip, şahsy dikeldiş maksatnamasyny düzýärler. Bu maksatnama diňe bir lukmançylyk çäreleri we bejeriş bedenterbiýesini däl, eýsem psihologlar, logopedler we ýörite ugurly mugallymlar bilen geçirilýän sapaklary hem öz içine alýar. Merkeziň baş maksady – çagalara diňe saglygyny gowulandyrmaga däl, eýsem jemgyýetde özlerini has ynamly duýmaga ýardam bermekdir. Munuň üçin iň häzirki zaman usullar ulanylýar.
Söhbetdeşligiň dowamynda Lýudmila Kondraşowa 29-njy martda Türkmenistanyň Arkadag şäherinde geçirilen “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahatyň özünde galdyran täsirli duýgularyny paýlaşdy. Ol maslahatyň ýokary derejede guralandygyny aýratyn minnetdarlyk bilen belläp, ony ynsanperwer hyzmatdaşlygyň ösmegine möhüm goşant hökmünde häsiýetlendirdi. Bu maslahata gatnaşmak, şeýle ynsanperwer ugurda halkara tejribe alyşmagyň nähili ähmiýetlidiginiň aýdyň mysaly boldy. Lýudmila Kondraşowa şeýle hem, Türkmenistanyň wekillerini Merkeziň işleri bilen tanyşmak üçin gelip görmäge çagyrdy.
Ilçi Şagulyýew öz gezeginde, ýurtlaryň arasyndaky durmuş we ynsanperwer ulgamlarda bilelikdäki işiň näderejede möhümdigini nygtady. Ol, aýratyn hemaýata mätäç çagalaryň ýaşaýyş derejesini gowulandyrmaga göni täsir edip biljek bilelikdäki başlangyçlar we taslamalar üçin uly mümkinçilikleriň bardygyny belläp geçdi.
Minskde geçirilen duşuşyk hyzmatdaşlygy ösdürmäge bolan özara gyzyklanmalaryň tassyklanmagy bilen tamamlandy. Bu diňe bir diplomatik ädim däl, eýsem Türkmenistanyň bilen Belarusyň mümkinçilikleri birleşdirip, iki ýurduň arasyndaky mähirli we ynsanperwer gatnaşyklar berkitmek arkaly aýratyn hemaýata mätäç bolan çagalaryň abadançylygyny we bagtly geljegini üpjün etmek üçin has uly goşant goşmaga ýürekden bolan islegidir.
ORIENT
