Tokioada Türkmenistanyň Prezidenti we Ýaponiýanyň Premýer-ministriniň arasynda gepleşikler geçirildi
15-nji aprelde, şişenbe güni Türkmenistanyň Prezidenti Serdar Berdimuhamedow Ýaponiýanyň Premýer-ministri ministri Sigeru Isiba bilen Tokioda gepleşikleri geçirdi. Türkmenistanyň Baştutanyna hormatyna resmi garşylaýyş dabarasy Ýaponiýanyň Premýer-ministriniň edara binasynda geçirildi.
Iki ýurduň Döwlet baýdaklarynyň öňünde ýadygärlik surata düşmek dabarasyndan soňra, Bilelikdäki metbugat beýanaty kabul edildi, şeýle-de şol pursatda Türkmenistanyň Daşary işler ministrligi bilen Ýaponiýanyň Ykdysadyýet, söwda we senagat ministrliginiň arasynda energiýa geçişlerini amala aşyrmak boýunça hyzmatdaşlyk etmek hakynda gol çekilen Ähtnama yglan edildi.
Iň ýokary derejede gepleşikleri açyp, Sigeru Isiba şu gezekki saparyň Prezident Serdar Berdimuhamedow üçin Ýaponiýa ilkinji saparydygyny belledi we çakylygy kabul edip, Ýaponiýa gelendigi üçin ýokary derejeli myhmana hoşallyk bildirdi. Premýer-ministr Sigeru Isiba döwlet Baştutanyny “EKSPO — 2025” Bütindünýä sergisinde Türkmenistanyň Milli gününiň üstünlikli geçirilmegi bilen gutlap, bu waka mynasybetli geçirilen dabaralaryň ýokary guramaçylyk derejesini belledi.
Premýer-ministr hemişelik Bitaraplyk hukuk ýagdaýy BMG-niň Baş Assambleýasynyň degişli Kararnamalary bilen üç gezek berkidilen Türkmenistanyň sebitde we dünýäde parahatçylygy, durnukly ösüşi üpjün etmäge gönükdirilen başlangyçlaryna Ýaponiýada ýokary baha berilýändigini aýtdy.
Döwlet Baştutany öz adyndan, şeýle hem Türkmenistanyň wekiliýetiniň adyndan mähirli garşylandyklary we myhmansöýerlik üçin ýapon tarapyna minnetdarlyk bildirip, Premýer-ministr Sigeru Isiba türkmen halkynyň Milli Lideriniň salamyny, iň gowy arzuwlaryny ýetirdi.
Pursatdan peýdalanyp, Prezident Serdar Berdimuhamedow Ýaponiýanyň Hökümet Baştutanyny Osakada “EKSPO — 2025” dabaraly açylmagy bilen gutlady we bu Bütindünýä sergisiniň innowasiýalaryň, medeniýetleri özara alyşmagyň, ählumumy derejede hyzmatdaşlygyň aýdyň nyşany bolup durýandygyny belledi.
Nygtalyşy ýaly, Türkmenistan we Ýaponiýa ähli ugurlar boýunça üstünlikli hyzmatdaşlyk edýärler. Iki ýurduň arasynda işjeň syýasy dialog alnyp barylýar, söwda-ykdysady gatnaşyklar ösdürilýär, medeni-ynsanperwer ulgamdaky hyzmatdaşlyk dowam etdirilýär. Parlamentara gatnaşyklary berkitmäge aýratyn ähmiýet berilýär.
Türkmen-ýapon hyzmatdaşlygy “Merkezi Aziýa — Ýaponiýa” dialogynyň çäklerinde-de üstünlikli ösdürilýär. Bu dialog köptaraplaýyn hyzmatdaşlygyň netijeli görnüşi bolup durýar. Degişli formatyň çäklerinde oba hojalygy, ulag we maýa goýumlar ýaly ugurlary öz içine alýan sebit derejesindäki birnäçe ykdysady taslamalar durmuşa geçirilýär.
Serdar Berdimuhamedow ikitaraplaýyn gatnaşyklaryň esasy ugurlaryna ünsi çekdi. Birinji ugur — syýasy-diplomatik ulgamdaky özara gatnaşyklar diýip, Türkmenistanyň Prezidenti aýtdy we ýurdumyzyň türkmen-ýapon syýasy dialogyny mundan beýläk-de ösdürmäge uly ähmiýet berýändigini nygtady. Şunuň bilen baglylykda, ikitaraplaýyn gatnaşyklary güýçlendirmek üçin daşary syýasat edaralarynyň ugry, şeýle-de iki ýurduň halkara guramalaryň ýanyndaky wekilhanalary boýunça özara hereketleri işjeňleşdirmegi teklip etdi.
Ikinji ugur – söwda-ykdysady gatnaşyklary giňeltmekdir. Häzirki wagta çenli Türkmenistanda ýapon kompaniýalarynyň gatnaşmagynda birnäçe iri taslamalar durmuşa geçirildi. Şunuň bilen baglylykda, Prezident Serdar Berdimuhamedow ýurdumyzyň ýaponiýaly hyzmatdaşlar bilen täze ykdysady taslamalary amala aşyrmakda işjeň gatnaşyklary dowam etdirmäge taýýardygyny tassyklady. Şolaryň hatarynda ammiak we karbamid, şeýle-de tebigy gazdan benzin öndürýän ikinji zawodlaryň gurluşyklaryny bellenildi.
Döwlet Baştutany medeni-ynsanperwer ulgamdaky hyzmatdaşlygy üçünji esasy ugur hökmünde görkezdi. Ýaponiýanyň ilçihanasynyň guramagynda Aşgabatda Ýapon kinosynyň günleri, Ikebananyň we ýapon aşhanasynyň tanyşdyrylyşy ýaly dürli medeni çäreler yzygiderli geçirilýär. 2024-nji ýylda Aşgabatda açylan “Magtymguly Pyragy” medeni-seýilgäh toplumynda ýapon ýazyjysy Ýasunari Kawabatanyň heýkeli oturdyldy.
Iki ýurduň ýokary okuw mekdepleriniň arasynda göni gatnaşyklar ýola goýuldy. Türkmenistanda ýapon dilini öwrenmäge uly ähmiýet berilýär. Häzirki wagtda ýurdumyzyň birnäçe ýokary okuw we orta mekdeplerinde ýapon dili öwredilýär diýip, Prezident Serdar Berdimuhamedow sözüni dowam etdi.
Serdar Berdimuhamedow şu ýyl Türkmenistanyň hemişelik Bitaraplygynyň 30 ýyllygynyň bellenilýändigini we 12-nji dekabrda Aşgabat şäherinde geçirilmegi meýilleşdirilýän halkara parahatçylyk we ynanyşmak forumynyň bolsa ýylyň esasy wakasy boljakdygyny aýtdy hem-de Sigeru Isibany bu forumyň işine gatnaşmaga çagyrdy.
