Abdullah Eren Türkmenistanyň öňdebaryjy ýokary okuw mekdeplerine baryp gördi
Türkmenistana amala aşyrýan saparynyň çäklerinde Daşary ýurtdaky türkleriň we kowumdaş jemagatlaryň işleri baradaky müdirligiň (YTB) Başlygy Abdullah Eren Türkmenistanyň Medeniýet ministrligine, şeýle hem ýurdumyzyň birnäçe öňdebaryjy ýokary okuw mekdeplerine baryp gördi.
Hususan-da, ol Halkara ynsanperwer ylymlary we ösüş uniwersitetinde, Türkmenistanyň Daşary işler ministrliginiň Halkara gatnaşyklar institutynda, şeýle hem Magtymguly adyndaky Türkmen döwlet uniwersitetinde bolup gördi.
Saparyň dowamynda Abdullah Eren ýokary okuw mekdepleriniň rektorlary bilen duşuşyk geçirip, onuň barşynda ikitaraplaýyn akademiki hyzmatdaşlygyň mümkinçilikleri, alyş-çalyş maksatnamalaryň ösdürilmegi hem-de türkmen talyplarynyň Türkiýäniň bilim başlangyçlaryna gatnaşmak mümkinçiligi barada maslahatlaşyldy. Türkiýeden gelen myhman okuw işiniň häzirki ýagdaýy bilen tanyşdy. Jenap Eren Türkmenistanyň ýokary okuw mekdepleriniň ylymda, bilimde we halkara gatnaşyklarda gazanan üstünliklerine aýratyn üns berdi.
Ol talyplaryň ýokary taýýarlyk derejesi barada belläp, iki ýurduň ýokary okuw mekdepleriniň arasyndaky hyzmatdaşlygyň mundan beýläk-de üstünlikli ösdüriljekdigine ynam bildirdi. Magtymguly adyndaky Türkmen döwlet uniwersitetine amala aşyran saparynyň dowamynda jenap Erene ýadygärlik sowgat hökmünde milli türkmen dony we telpegi gowşuryldy.
ORIENT news
