Türkmenistanda maldarçylyk pudagyny ösdürmek boýunça täze taslama
Türkmenistanda et we süýt önümçiligini artdyrmaga gönükdirilen giň gerimli maldarçylyk taslamasy başlanýar. Degişli Karara çarşenbe güni Prezident Serdar Berdimuhamedow gol çekdi.
Resminama laýyklykda, Döwlet maldarçylyk we guşçulyk senagaty birleşigi «Altyn halka» döwlet kärhanasy üçin maldarçylyk fermasynyň taslamasyny taýýarlar.
Taslama bar bolan desgalary täzeden dikeltmegi we täze binalary gurmagy, olary döwrebap enjamlar bilen üpjün etmegi göz öňünde tutýar. Karara laýyklykda, Döwlet birleşigi degişli oba hojalyk enjamlaryny, ýöriteleşdirilen ulag serişdelerini we ýokary öndürijilikli iri şahly mallary satyn almaly.
Döwlet Baştutany sargytçyny degişli işleri mart aýynda başlamaga borçlandyrdy we maldarçylyk fermasynyň hut bir ýyl soň ulanylyşa berilmelidigini belledi.
Bu taslamanyň maldarçylyk pudagynyň netijeliligini ýokarlandyryp, Türkmenistanyň azyk howpsuzlygyna möhüm goşant goşmagyna garaşylýar.
ORIENT
