Türkmen ýaşlary Indoneziýada geçirilen Halkara ylym sergi-bäsleşiginde üstünlikli çykyş etdiler
Türkmenistanyň Oguz han adyndaky Inžener-tehnologiýalar uniwersitetiniň talyplary Süleýmanmuhammet Şamuhammedow we Aýmyrat Halnazarow Indoneziýanyñ Malang şäherinde ýaşlaryñ arasynda geçirilen 5-nji Halkara ylym sergi bäsleşigine (YISF) gatnaşyp, altyn medallara eýe boldular.
Şol uniwersitetiň mugallymy Atamyrat Altyýewiñ ýolbaşçylygyndaky türkmen wekiliýeti Senagat galyndylar materialyndan ýaşyl sement almagyñ ylmy esaslary atly ylmy işi bilen aşakdaky netijeleri gazandylar:
Daşky gurşawy goramak ylmy kategoriýasy boýunça 1-nji orna;
Malaýziýanyň ýaş alymlar guramasynyň (MYSO) Ýörite baýragyna;
Indoneziýanyň ýaş alymlar assosiýasynyň (IYSA) «Semi grand award» baýragyna.
Ýaşlaryñ Halkara ylym sergi (YISF) bäsleşigi jemgyýetçilik ylymlary, daşky gurşaw, ýaşaýyş ylymy, innowasion ylymlar we inženerçilik ýaly bäş ugur boýunça geçirilip 24 ýurtdan 446 topar gatnaşdy.
Bäsleşigiň çäklerinde şeýle hem Indoneziýa, Awstriýa, Hytaý, Gazagystan, Fillippinler, Günorta Afrika, Meksika, Saud Arabystany, Günorta Koreýa, Özbegistan, Taýland, Birleşen Arab Emirlikleri, Bangladeş, Eýran, Rumyniýa, Braziliýa, Türkiýe Respublikasy, Singapur, Wýetnam, Amerikanyñ Birleşen Ştatlary, Hindistan we Malaýziýa ýaly ýurtlardan gatnaşyjylar gatnaşdylar.
ORIENT news
